Гродна, Горадня… Горад каралёў, горад слаўных рыцараў.
Горад, які стаў сведкам незлічоных бітваў з крыжакамі — у мясцовым музеі захоўваецца тэўтонскі меч, на лязе якога напісана: «Пі кроў».
Калі вы думаеце, што ўпершыню нашы землякі ваявалі пад Берлінам толькі ў 1945-м, дык памыляецеся. Яшчэ ў XIV стагоддзі са сваім атрадам да ваколіц Берліна дайшоў менавіта гарадзенскі князь Давыд, зяць Гедыміна.
Гродзенскі замак у камені узводзіў вялікі князь Вітаўт, а перабудаваў і заснаваў тут сваю рэзідэнцыю адзін з самых слаўных каралёў Рэчы Паспалітай Стэфан Баторый.
Тут жа ён і памёр у 1586 годзе. Таксама ў Гродна памёр каралевіч Казімір, які пазней быў кананізаваны і стаў заступнікам Вялікага Княства Літоўскага.
У Гродне праходзілі Соймы Рэчы Паспалітай, шляхта з ваколіцаў Вільні, Познані, Кракава, Варшавы, Львова, Кіева, Віцебска, Мінска з'язджаліся сюды, каб разам вырашаць лёс шматнацыянальнай дзяржавы.
Горад памятае герояў Тадэвуша Касцюшку, Якуба Ясінскага, Кастуся Каліноўскага, Зыгмунта Серакоўскага, Валерыя Урублеўскага, а таксама Элізу Ажэшка, Антонія Тызенгаўза, Напалеона Орду.
Акрамя найбагацейшага пласта гістарычнай памяці, у горадзе засталіся цудоўныя помнікі гісторыка-культурнай спадчыны.
Гэта і Каложа — Барысаглебская царква ХІІ стагоддзя, збудаваная на стромкім беразе Нёмана ў тэхніцы ўнікальнай гродзенскай архітэктурнай школы.
Гэта і вытанчаныя каталіцкія святыні, якія мясцовыя жыхары адстаялі ў гады ваяўнічага атэізму. Немагчыма не наведаць пышны Фарны (былы езуіцкі) касцёл XVIII ст., які дзівіць веліччу фасада і скульптурным багаццем інтэр'еру. Экскурсію працягне агляд касцёла Адшукання Святога Крыжа і кляштара бернардзінцаў XVIІ ст.
У панараме горада можна ўбачыць сілуэты касцёла Маці Божай Анёльскай і кляштара францысканцаў XVII ст., А таксама касцёла Звеставання Найсвяцейшай Панны Марыі ордэна брыгітак XVII ст. Таксама ў горадзе ёсць святыні юдэйскія, лютэранскія, праваслаўныя…
Візітоўкай горада з'яўляюцца каралеўскія замкі. Проста над Нёманам размясціўся Стары замак (XIV-XVI ст.) Вітаўта і Баторыя. Побач - Новы замак пачатку XVIII ст., у якім бываў апошні кароль Рэчы Паспалітай Станіслаў Аўгуст Панятоўскі, тут жа прайшоў і апошні («нямы») сойм.
Непаўторнае аблічча гораду надаюць яго старадаўнія вулкі, скверы, паркі.
Безумоўна, аднаго дня мала, каб атрымаць асалоду ад усёй прыгажосці Гродна. Тым не менш, фонд «Краіна замкаў», які запрашае на экскурсію ў каралеўскі горад, пастараецца паказаць усё найлепшае, што было назапашана многімі пакаленнямі.
У завяршэнне праграмы госці наведаюць агратурыстычны комплекс «Гарадзенскі маёнтак «Каробчыцы». Тут можна адпачыць ад гарадской мітусні сярод беларускай прыроды, агледзець архітэктурны комплекс, стылізаваны пад рамантычную сядзібу XVIII-XIX стагоддзя.
Запісацца ў вандроўку па каралеўскай Горадні можна патэлефанаваўшы:
(17) 203-69-70
(17) 226-03-02
(29) 682-58-07
(29) 772-77-58
Болей інфармацыі — на сайце www.zamak.by.
Фонд «Краіна замкаў». УНП 690382807
Цяпер чытаюць
«Жэня пагадзіўся на будоўлю, а не ваяваць. І толькі калі выйдзе з запою!»: як прадалі ў расійскую армію жыхара Лёзна. Ахвяра не адна6
Каментары