Аляксандр Лукашэнка ставіць задачу за два гады ліквідаваць чаргу для тых, хто мае патрэбу ў паляпшэнні жыллёвых умоў сярод шматдзетных сем'яў. Пра гэта ён заявіў сёння на рэспубліканскім семінары-нарадзе аб павышэнні эфектыўнасці будаўнічага комплексу Беларусі, піша БелТА.
«Калі з агульнай чаргой у цэлым разабраліся, і колькасць усіх, хто мае патрэбу ў паляпшэнні жыллёвых умоў штогод зніжаецца, то чарга шматдзетных сем'яў бесперапынна расце», - звярнуў увагу беларускі кіраўнік.
Паводле яго слоў, за два апошнія гады іх колькасць павялічылася на 8,5 тыс. Пры гэтым паўсюдна не выконваецца даручэнне аб накіраванні шматдзетных сем'яў на будаўніцтва жылля на працягу аднаго года. На пачатак 2018 года са 34 тыс. такіх сем'яў не накіраваны на будаўніцтва 25 тыс., а амаль 7 тыс. чакаюць у чарзе больш за тры гады.
Аляксандр Лукашэнка назваў такую сітуацыю недапушчальнай і паставіў задачу ўраду сумесна з аблвыканкамамі і Мінскім гарвыканкамам павялічыць аб'ёмы будаўніцтва жылля для гэтай катэгорыі маючых патрэбу. «Разам з банкамі вызначыце неабходныя крыніцы фінансавання, за два наступныя гады ліквідуйце чаргу, якая ўтварылася, і выйдзіце на забеспячэнне шматдзетных сем'яў жыллём на працягу аднаго года, як гэта прадугледжана ўказам №13», — даручыў кіраўнік дзяржавы.
Каментары