«Запытаў у дыспетчара магчымасць ехаць без прыпынкаў». Як кіроўца тралейбуса выявіў зніклага хлопчыка-аўтыста
Арыенціроўка, якую разаслаў пошукава-выратавальны атрад «Анёл» ў чацвер днём, не пакінула раўнадушным, здаецца, нікога, піша sb.by. «Знік хлопчык. Павінен быў выйсці з тралейбуса на прыпынку «Валгаградская», але паехаў далей».
Праблема ў тым, што 11-гадовы Коля — аўтыст, хлопчык не размаўляе.
Добрыя навіны прыйшлі пад вечар. Хлопчык знойдзены, яго вязуць да мамы. Знаёмцеся з уважлівым і неабыякавым героем, які заўважыў згубу - Андрэй Міхнавец, 29-гадовы кіроўца тралейбуса 29-га маршруту.
— СМС аб тым, што шукаюць дзіця, спачатку прыйшло ад дыспетчара. Затым па вадзіцельскім Вайберы даслалі фатаграфію. Гэта і дапамагло. Калі б яе не было, хлопца наўрад ці заўважыў бы, хоць у салоннае люстэрка на прадмет падазроных людзей гляджу пастаянна.
Але той хлопец збоку падаваўся цалкам сабе звычайным. Вось вы, напрыклад, часта звяртаеце ўвагу на дзяцей школьнага веку, якія проста сядзяць і глядзяць па баках? А так усё ж звярнуў увагу: а ці не гэты хлапчук сядзіць на адзіночным сядзенні каля сярэдніх дзвярэй? Праехаў яшчэ пару прыпынкаў. Прыгледзеўся. Дакладна ён. Адзін у адзін, хай і апрануты па-іншаму. Параіўся з людзьмі, яны пацвердзілі: падобны.
Падышлі да яго, задалі пытанне. Той не адказаў, адвёў позірк. Я зрабіў фота. Здалёк, каб не спалохаўся і не ўцёк. Звязаўся з бацькамі. А паралельна запытаў у дыспетчара магчымасць ехаць без прыпынкаў. На «Мяснікова» абвясціў, што тралейбус далей не пойдзе па тэхнічных прычынах. Зрэшты, адзін пасажыр усё ж зайшоў. Я правёз яго адзін прыпынак, выйшаў, папярэдзіў, растлумачыў сітуацыю.
На Якуба Коласа Колю ўжо чакала мама. Гісторыя, дзякуй Богу, скончылася хэпі-эндам.
Каментары