Заклеіў рот скотчам: у Гродне актывіста пакаралі за святкаванне 7 лістапада
26 лістапада ў судзе Ленінскага раёна Гродна разглядалі справу кіраўніка Гродзенскай абласной арганізацыі АГП Мікалая Саляніка. За акцыю 7 лістапада суд пастанавіў аштрафаваць актывіста на 35 базавых велічынь — 857 рублёў, піша Hrodna.life.
Суд павінен быў прайсці 22 лістапада, але не адбыўся, бо Мікалай Салянік прыйшоў у робе зняволенага і з драўлянай калодкай. У выніку суддзя перанёс пасяджэнне. 26 лістапада актывіст прыйшоў у звычайным строі.
«Першы раз я прыходзіў так, як мы жывём сёння, а другi раз я прыйшоў так, як бы хацеў жыць».
Разгляд справы адбыўся, але не без скандалу. Падчас пасяджэння Салянік заматаў сабе рот скотчам і быў выдалены з залы суда за парушэнні.
З залы была выдаленая і група падтрымкі актывіста. Прысуд Саляніку выносіўся ў прысутнасці журналістаў і аднаго супрацоўніка міліцыі. У выніку паводле арт. 23.34, ч.3 и арт. 20.34 КаАП суддзя Руслан Гурын пакараў грамадскага актывіста штрафам на 35 базавых велічынь, што складае ажно 857 рублёў.
Раней, 8 лістапада, той жа суддзя Руслан Гурын пакараў грамадскага актывіста Аляксандра Лаўрэнцьева на 30 базавых велічынь, што складае 735 рублёў.
Нагадаем, 7 лістапада міліцыя затрымала Мікалая Саляніка разам з іншым членам АГП у Гродне Аляксандрам Лаўрэнцьевым за спробу правядзення несанкцыянаванага пікету. У той дзень Салянік і Лаўрэнцьеў прайшлі па цэнтры горада з плакатам «Долой Самодержавие».
«Абскарджваць прысуд я не бачу сэнсу, таму што не веру ў гэта заканадаўства. Я, у мінулым камуніст, хацеў адзначыць свята на плошчы Леніна, але супрацоўнікі міліцыі мне не далі гэта зрабіць. Яны раніцай мяне затрымалі і выпусцілі толькі пасля таго, як усё прайшло. Гэта нармальна? Я ў выніку са сваім калегам выйшаў пасля ўсяго з галоўным лозунгам рэвалюцыі, але быў затрыманы», — сказаў Салянік.
За што былі затрыманыя актывісты раніцай 7 лістапада, яшчэ да таго, як правялі акцыю, супрацоўнікі міліцыі адмовіліся каментаваць.
Тамара Віннікава прадала свой лонданскі дом, завешаны карцінамі самой сябе ШМАТ ФОТА23
Каментары