Беларусь плануе капітальны рамонт пяці участкаў нафтаправода «Дружба». Пра гэта паведаміў журналістам галоўны інжынер ААТ «Гомельтранснафта Дружба» Андрэй Вярыга, піша ТАСС.
«Заўсёды ёсць ўчасткі нафтаправода, якія маюць патрэбу ў капітальным рамонце. Мы праектуем цяпер пяць участкаў для капітальнага рамонту. Ужо год ідуць праектныя работы», — сказаў ён.
Вярыга адзначыў, што у 2019 годзе нафтаправоду будзе 55 гадоў. Паводле яго слоў, знос асноўных фондаў актыўнай часткі нафтаправода цяпер складае больш за 65%.
Галоўны інжынер кампаніі дадаў, што рамонт, а таксама мадэрнізацыя нафтаправода праходзяць у планавым парадку з улікам яго амартызацыі. Ён адзначыў, што рамонт нафтаправода спецыялісты пачнуць «па меры гатоўнасці сістэмы і магчымасці, дапушчальнасці перапынкаў». «Вядома, усе работы выконваюцца з улікам планаў транспарціроўкі нафты», — сказаў Вярыга. Пры гэтым ён указаў, што трубаправод можа быць спынены толькі ў выпадку «планавых рамонтаў, альбо аварыйнай сітуацыі».
На сённяшняй нарадзе з урадам Аляксандр Лукашэнка заявіў, што беларускі бок пры неабходнасці будзе закрываць нафтаправоды на рамонт, нягледзячы на транзіт расійскай нафты.
У 2018 годзе па сістэме ААТ «Гомельтранснафта Дружба» перапампаваныя 60,4 млн т нафты, з іх 58,8 млн т — пастаўкі з Расіі, што складае каля чвэрці нафтавага экспарту Расіі.
Каментары