6 красавіка ў Лондане памерла брытанская лінгвістка, даследчыца славянскіх і цюркскіх моваў і літаратураў, эксперт па Цэнтральнай Азіі Шырын Акінэр, піша Радыё Свабода.
Шырын Акінэр нарадзілася ў 1943 годзе ў горадзе Дака ў тагачаснай Брытанскай Індыі. Вучылася ў Лонданскім універсітэце, дзе вывучала славянскую філалогію і турэцкую мову і літаратуру. У 1980 годзе абараніла дактарат на тэму «Рэлігійная лексіка татарска-беларускага кітаба са збораў Брытанскай бібліятэкі».
Выкладала ў Школе ўсходніх і афрыканскіх даследаванняў. У 2013 годзе была ўганараваная прэміяй імя Чынгіза Айтматава за шматгадовае вывучэньне рэгіёну.
З 1970-х гадоў Шырын Акінэр, працуючы над дактаратам, падтрымлівала цесныя кантакты з брытанскімі беларусамі, перадусім з Беларускай бібліятэкай імя Францішка Скарыны і яе кіраўніком айцом Аляксандрам Надсанам.
Шырын Акінэр належыць заслуга азнаямлення англамоўнага свету з духоўнай спадчынай беларускіх татараў — кітабамі (кнігі, напісаныя на беларускай мове арабскім пісьмом). Яе працы публікаваліся ў выдаваным у Лондане навуковым часопісе «The Journal of Byelorussian Studies».
Апрача таго яна даследавала творчасьць беларускіх пісьменьнікаў у Польшчы. У 1982 годзе ў Беластоку выйшла яе праца «Сучасныя беларускія пісьменнікі ў Польшчы», а ў 1984 годзе ў Лондане — кніга «Мініяцюры» Сакрата Яновіча па-беларуску і па-англійску (у яе перакладзе і з яе прадмовай).
Пахаванне Шырын Акінэр адбудзецца ў Лондане 7 мая.
Цяпер чытаюць
Як склаўся лёс Яны Пачыцкай — дзяўчыны, якую затрымлівалі разам з Канавалавым і Кавалёвым па справе аб тэракце ў метро4
Каментары