«Мы блізкія да кропкі незвароту»: Макей у ААН заклікаў адмовіцца ад РСМД і змагацца са зменамі клімату
Міністр замежных спраў Беларусі Уладзімір Макей, выступаючы на агульнай дыскусіі 74-й сесіі Генеральнай асамблеі ААН, нагадаў пра пагрозу размяшчэння ракет сярэдняй і меншай далёкасці ў Еўропе, піша БелТА. У жніўні спыніла сваё дзеянне Дамова аб ліквідацыі ракет сярэдняй і меншай далёкасці. Гэта дамова з'яўлялася адным з найважнейшых элементаў сучаснай раззбраенчай архітэктуры і сімвалам заканчэння халоднай вайны.
«Узнікла рэальная пагроза з'яўлення такіх ракет, з падлётным часам у некалькі хвілін, у розных рэгіёнах свету, у тым ліку ў Еўропе. Гэта непазбежна пацягне за сабой далейшы рост напружанасці, новы віток палітычнай і ваеннай канфрантацыі, павышэнне рызыкі ядзернага апакаліпсісу. Менавіта таму мы выступаем за неадкладныя сумесныя дзеянні па захаванні дасягненняў Дамовы аб ліквідацыі ракет сярэдняй і меншай далёкасці ў нашым агульным доме - на еўрапейскім кантыненце», - падкрэсліў міністр.
«Наша краіна прапануе неадкладна пачаць працу па падрыхтоўцы праекта дэкларацыі. Заклікаем дзяржавы па абодва бакі Атлантыкі, якія неабыякавыя да лёсу чалавецтва, падтрымаць нас у гэтым пачынанні», - сказаў Уладзімір Макей.
Ключавым элементам гэтага дакумента Беларусь бачыць ясныя і цвёрдыя абавязацельствы краін па неразмяшчэнні на сваёй тэрыторыі ракет сярэдняй і меншай далёкасці і адмову ад іх вытворчасці.
Таксама кіраўнік МЗС адзначыў, што свет становіцца блізкі да кропкі незвароту без рашучых дзеянняў у барацьбе са зменай клімату.
«Мы бачым, як на фоне росту насельніцтва планеты і, як следства, росту эксплуатацыі абмежаваных рэсурсаў Зямлі абвастраецца праблема змены клімату. Напэўна, мы вельмі блізкія да кропкі незвароту, калі не будуць прыняты самыя рашучыя дзеянні. Пакуль жа намаганні міжнароднай супольнасці па скарачэнні выкідаў відавочна адстаюць ад дынамікі разбуральных працэсаў кліматычных зменаў», - канстатаваў Уладзімір Макей.
Ён заявіў, што Беларусь як адказны ўдзельнік калектыўных намаганняў па барацьбе са зменай клімату мае намер узяць на сябе безумоўнае абавязацельства да 2030 года скараціць выкіды парніковых газаў не менш чым на 35% у параўнанні з 1990 годам выключна за кошт уласных рэсурсаў.
«Магутны імпульс пераходу да нізкавугляроднай эканомікі надаў быў запуск матывацыйнага механізму, які прадугледжвае перадачу краінам, якія развіваюцца перадавых ведаў і тэхналогій, а таксама кліматычныя інвестыцыі», - адзначыў міністр.
Разведка ЗША: Беларусь стала перадавым вайсковым плацдармам Расіі24
Каментары