Ад сёння ў Польшчы ўводзіцца абавязак закрываць рот і нос у грамадскіх месцах
Пачынаючы з сёння, у Польшчы ўводзіцца абавязак хаваць рот і нос у грамадскіх месцах. Гэта чарговы этап у барацьбе з эпідэміяй COVID-19, — растлумачыў намеснік галоўнага санітарнага інспектара Польшчы Гжэгаж Худзік, паведамляе «Радыё Польшча».
«Такім чынам мы абараняем нашу слізістую ад віруса, ад яго трапляння ў нашы дыхальныя шляхі, дзе вірус можа эфектыўна размножвацца, выклікаючы магутныя сімптомы хваробы. Функцыю бар'ера можа выконваць хустка, шалік і, вядома ж, маскі, якія можна пашыць самому або купіць гатовую», — сказаў Гжэгаж Худзік.
Намеснік галоўнага санітарнага інспектара Польшчы дадаў, што закрытыя рот і нос не вызваляюць ад абавязку выконваць сацыяльную дыстанцыю.
Абавязак хаваць рот і нос у грамадскіх месцах не распаўсюджваецца на дзяцей ва ўзросце да 4 гадоў і людзей, якія маюць сур'ёзныя праблемы з дыханнем ці няздольных самастойна здымаць маскі або шалікі.
Апошнія дні ў Польшчы новая колькасць выпадкаў заражэння каранавірусам зменшылася. Рост быў толькі ўчора — 380, але гэта меней чым у Беларусі (у Беларусі ўчора 447), усяго ў Польшчы 7 852 выпадкі.
Каментары