Незалежны журналіст Зміцер Лупач у рэанімацыі. Пасля суда ў яго здарыўся гіпертанічны крыз
10 сутак арышту і 45 базавых (1215 рублёў) штрафу прысудзіў суддзя Глыбоцкага раённага суда Дзмітрый Тарасевіч журналісту з Глыбокага Змітру Лупачу. Яго судзілі 11 мая паводле двух артыкулаў — «Незаконны выраб і распаўсюд прадукцыі СМІ» і «Парушэнне парадку арганізацыі альбо правядзення масавых мерапрыемстваў», паведамляе БАЖ.
Пасля сканчэння судовага слухання Змітра Лупача каля будынка суда чакалі міліцыянты на машыне. У іх на руках ужо была завераная пастанова суда, хоць сам Зміцер яе пакуль так і не атрымаў.
Журналісту стала дрэнна ў будынку суда, жонка памерала яму ціск — ён быў высокі, тады яна выклікала хуткую. Фельчар хуткай дапамогі пацвердзіла, што ў Змітра гіпертанічны крыз. Журналіста адвезлі ў Глыбоцкую раённую бальніцу. Карэту хуткай дапамогі суправаджаў міліцэйскі аўтамабіль.
Паводле слоў жонкі Змітра Лупача, пасля прыбыцця ў лякарню яго паклалі ў рэанімацыю.
Каментары