На беларускай маніфестацыі ў Варшаве затрымалі чалавека, які спаліў расійскі сцяг
Гэта быў Сяргей Каваленка — актывіст Кансерватыўна-хрысціянскай партыі БНФ.
Будаўнік з Віцебска, Каваленка ў свой час быў палітвязнем — яго асудзілі за вывешванне бел-чырвона-белага сцяга на галоўнай яліне Віцебска. Праз некаторы час пасля вызвалення ён пераехаў у Польшчу.
Пры канцы маніфестацыі салідарнасці ён абліў расійскі сцяг гаручай вадкасцю і падпаліў. Людзі побач яго асудзілі за гэта, а паліцыя затрымала, расказалі «Нашай Ніве» прысутныя.
Усяго на маніфестацыю сабралася больш за 500 чалавек.
Шэсце распачалося а 12:00 ад помніка Тадэвуша Касцюшкі, потым скіравалася на вуліцу Маршалкоўскую, дзе ўдзельнікі сталі ў жывы ланцуг, піша Белсат.
На мітынгу ў Варшаве выступіла спецдакладчыца ААН аб правах чалавека ў Беларусі Анаіс Марэн. Яна заклікала беларускія ўлады спыніць пераслед і палітычны ціск на грамадзянскую супольнасць.
«Пасля трагедыі ў 2010 годзе мы бачым, што ўлады вяртаюцца да рэпрэсіяў яшчэ да выбараў. Мы заклікалі спыніць пераслед і забяспечыць свабодныя выбары, але нас не паслухалі», — сказала Анаіс Марэн.
Многія прыйшлі з самаробнымі плакатамі «Нас 97%» і «Псіхо3%». Некаторыя прыйшлі з партрэтамі Віктара Бабарыкі і сімволікай яго кампаніі, з партрэтамі іншых палітвязняў.
Людзі спявалі песню «Разбуры турмы муры».
Адначасова шматлюдныя, з удзелам соцень людзей, акцыі салідарнасці прайшлі ў Празе і на Кіпры — дзе ніколі раней беларуская дыяспара не праводзіла масавых акцый.
Вось відэа з Кіпра:
Усюды людзі прыйшлі з Пагонямі і нацыянальнымі сцягамі.
Яны гавораць па-руску і па-беларуску, але аднолькава скандуюць «Жыве Беларусь!» і «Уході».
Каментары