18:49 Рэшту давялі да вуліцы Даўмана, дзе кніжны кірмаш. Удзельнікаў акцыі застаўся з дзесятак.
18:36 Давялі да Свіслачы і цяпер гоняць вуліцай Старажоўскай.
Удзельнікі акцыі жартуюць: "А хто тут у вас экскурсавод? Куды ідзем?"
18:32 Усіх давялі вуліцай Купалы да скрыжавання з вуліцай Багдановіча. Пераходзяць дарогу, прычым не па пешаходным пераходзе.
18:25 Усіх пагналі назад як далей ад моста і Кастрычніцкай.
18:24 Вяртаюцца на Плошчу. На мосце дарогу перакрыў спецназ. Севярынец палохае спецназаўцаў захадамі з боку міністра замежных спраў Мартынава.
18:21 Усіх адпусцілі ля НВЦ "Белэкспа" (Купалы, 27). Севярынец заклікае ўсіх вярнуцца на Плошчу.
18:17 Амонаўцы давялі ўдзельнікаў акцыі да мосту цераз Свіслач (скрыжаванне Купалы і Інтэрнацыянальнай).
18:12 Усіх вядуць у бок вуліцы Інтэрнацыянальнай. Пачалася патасоўка. Павалілі на зямлю Мікалая Дземідзенку.
18:10 Зачыстка. Амонаўцы выцясняюць удзельнікаў акцыі да Музея Вялікай Айчыннай вайны, ламаюць сцягі.
18:04 Зараз на плошчы сабралася каля 40—50 чалавек. Абсалютная большасць – моладзь, яны трымаюць партрэты зніклых беларускіх асобаў (Юрыя Захаранкі, Віктара Ганчара, Анатоля Красоўскага, Дзмітрыя Завадскага), а таксама ваўкавыскіх прадпрымальнікаў (Мікалая Аўтуховіча, Юрыя Лявонава, Уладзіміра Асіпенкі), што больш за два месяцы ўтрымліваюцца ў следчым ізалятары.
Ёсць адзін вялікі бел-чырвона-белы сцяг і сцягі "Еўрапейскай Беларусі".
Трымаюць таксама вялікую расцяжку "Свабоду палітвязням". З вядомых асобаў - Андрэй Саннікаў, Зміцер Бандарэнка (абодва - каардынатары Хартыі’97), моладзевыя лідэры Зміцер Дашкевіч, Артур Фінькевіч, Арцём Дубскі, які учора выйшаў са следчага ізалятару. Арцём трымае ў руках партрэт Юрыя Лявонава.
Крыху пазней з'явіліся на плошчы старшыня Партыі БНФ Лявон Баршчэўскі і сустаршыня БХД Павел Севярынец.
Удзельнікі акцыі крычаць "Свабоду палітвязням".
***
Акцыі салідарнасці з палітвязнямі праходзяць кожны месяц 16-га чысла.
Каментары