Польскі незалежны прафсаюз «Салідарнасьць» 26 жніўня адправіць у Беларусь гуманітарную дапамогу ў выглядзе некалькіх дзясяткаў тон харчовых прадуктаў, «што можа спатрэбіцца на працоўных месцах падчас забастоўкі», паведаміў старшыня прафсаюзу Пётар Дуда, піша Радыё Свабода са спасылкай на выданьне Wiadomości.
Таксама ў Польшчы стварылі фонд «Салідарнасьць зь Беларусьсю», у які прафсаюз «Салідарнасьць» унёс 1 мільён злотых (больш за 700 тысяч рублёў).
25 жніўня старшыня прафсаюзу Пётар Дуда выступіў са «Зваротам да Беларусі» і склікаў канфэрэнцыю па дзейнасьці прафсаюзу ў падтрымку беларусаў у барацьбе за свабоду і грамадзянскія правы.
«Мы назіраем за разьвіцьцём падзей у Беларусі пасьля фальсыфікацыі вынікаў прэзыдэнцкіх выбараў зь вялікай заклапочанасьцю і непакоем. Аляксандар Лукашэнка абраў шлях жорсткага супрацьстаяньня і жорсткага ўціхамірваньня беларусаў, якія дэманстравалі сваю апазыцыю. Улада ўдзельнічае ў барбарскім гвалце і жорсткіх зьверствах, якія ня маюць ніякага рацыянальнага апраўданьня, акрамя адчайнай абароны дыктатуры», — напісаў Пётар Дуда ў звароце.
Ён падкрэсьліў, што для «Салідарнасьці» гэта асаблівы момант, таму што 40 гадоў таму дапамога была патрэбная палякам, а цяпер падтрымка патрэбная беларусам. Ён дадаў, што ў Беларусі «менавіта прафсаюзных актывістаў, рабочых звальняюць і адпраўляюць у турмы, таму што яны знаходзяцца ў авангардзе забастовак супраць фальсыфікаваных выбараў».
«Прафсаюз «Салідарнасьць» абавязаны падтрымліваць адзіны ў Беларусі свабодны прафсаюз, а менавіта Беларускі кангрэс свабодных дэмакратычных прафсаюзаў зь ягоным старшынём Аляксандрам Ярашуком. Мы супрацоўнічаем зь ім шмат гадоў. Іншыя прафсаюзы ў Беларусі зьвязаныя з рэжымам», — сказаў Дуда.
Дуда таксама заклікаў іншыя польскія прафсаюзы і ўсе палітычныя партыі далучыцца да «Салідарнасьці» і дапамагчы Беларусі, «падтрымаць беларускія сем’і, якія страцяць кармільца з прычыны арышту або звальненьня».
Цяпер чытаюць
Хто з беларусаў трапіў на прыём да прэзідэнта Польшчы ШМАТ ФОТА37
Каментары