Нобелеўская лаўрэатка па літаратуры, сябра прэзідыума Каардынацыйнай Рады Святлана Алексіевіч у першай палове дне 9 верасня паразмаўляла з журналістамі, прыводзім некалькі цытат.
Пра палітыку афіцыйнай Расіі
«Канечне, Расія можа страціць Беларусь. Яна атрымае тэрыторыю, але не атрымае людзей. Яна страціць людзей, яна страціць сваіх братоў, а беларусы заўсёды лічылі рускіх сваімі братамі. Калі ў Расіі ёсць такая палітыка, то, як там спявалі ва ўкраінскай песні, не будзе больш братамі».
Пра магчымы ад’езд з Беларусі
«Не, я не хачу, але вы ведаеце, якія ў нас спосабы. Малайчына Маша [Калеснікава — «НН»], як яна, па-мойму, скончыла з гэтай практыкай: адпраўляць людзей кудысьці».
Пра атмасферу ўнутры Беларусі
«Гэта тэрор, тэрор супраць уласнага народа. Гэта значыць адзін чалавек ажыццяўляе тэрор супраць свайго народа. І мы, на жаль, аказаліся бездапаможныя».
Ці выходзіць цяпер на вуліцу?
«Выходжу, але не адна. Таму што, вы ж ведаеце, вось вы былі тут, усе… Вядома, вы пойдзеце — яны ўсё могуць зрабіць. Але я хачу сказаць, што мы павінны адзін аднаго падтрымліваць».
Пра Каардынацыйную раду
«Пасля таго, як забралі Максіма Знака, больш нікога ў прэзідыуме Каардынацыйнай рады не засталося. Але Рада будзе працаваць, людзей, насуперак запалохванням, далучаецца ўсё больш. Апусцелыя месцы зоймуць новыя асобы».
Пра пратэсты
«Лукашэнка кажа, што не збіраецца дамаўляцца з вуліцай. Але вуліца — гэта і ёсць народ. Не тыя, каго ён сам прызначыў «народам», а ўсе мы — настаўнікі, медыкі, айцішнікі. Увесь сацыяльны зрэз. А пыха ўлады якраз прыводзіць да небяспечнага разрыву. Як бы ні спрабавалі ягоныя прыслужнікі сцвярджаць, што выходзяць наркаманы і забойцы, увесь свет бачыць зусім іншае — цудоўныя, адухоўленыя твары сапраўдных беларусаў».
Каментары