Мінздароўя шукае 100 добраахвотнікаў, якія выпрабуюць расійскую вакцыну супраць каранавіруса
Мінздароўя атрымала пакет дакументаў для правядзення клінічнага выпрабавання вакцыны «Гам-Кавід-Вак», паведамляецца ў тэлеграм-канале ведамства.
Цяпер спецыялісты Мінздароўя робяць экспертызу дакументаў камбінаванай вектарнай вакцыны для прафілактыкі каранавіруснай інфекцыі. Яна зроблена цэнтрам імя Гамалеі Мінздароўя Расіі.
Адзначаецца, што пры выкананні экспертных работ будзе ацэненая магчымасць атрымання ў ходзе клінічнага выпрабавання дакладных звестак аб эфектыўнасці і бяспецы вакцыны, а таксама этычныя пытанні правядзення выпрабаванняў ды інш.
Даследаванне вакцыны плануецца правесці ў падвойным сляпым плацэба-кантраляваным дызайне. Дадзенае выпрабаванне будзе часткай буйнамаштабнага даследавання вакцыны «Гам-Кавід-Вак», якое праводзіцца на тэрыторыі Расіі.
Плануецца, што ў Беларусі ў даследаванне будзе ўключана каля 100 удзельнікаў.
Жадаючыя прыняць удзел у вакцынацыі могуць падаваць заяўкі на сайтах арганізацый аховы здароўя, якія выбраны ў якасці даследчых цэнтраў:
— 1-я цэнтральная раённая клінічная паліклініка Цэнтральнага раёна Мінска
— 4-я гарадская паліклініка Мінска
— 5-я гарадская клінічная паліклініка Мінска
— 14-я цэнтральная раённая паліклініка Першамайскага раёна Мінска
— 19-я цэнтральная раённая паліклініка Першамайскага раёна Мінска
— 28-я раённая паліклініка Мінска
— Мінская абласная клінічная бальніца
— Віцебская абласная клінічная бальніца
Каментары