Экс-выдаўцу «Новай газеты Смаргоні» Рамуальду Улану далі 2,5 года «хіміі» за лістоўкі пра міліцыянераў
5 студзеня ў судзе Смаргонскага раёна абвясцілі прысуд прадпрымальніку і былому ўладальніку і рэдактару «Новай газеты Смаргоні» Рамуальду Улану. Яго прызналі вінаватым у парушэнні артыкула 188 Крымінальнага кодэкса «Паклёп». Суд прызнаў Улана вінаватым у распаўсюджанні непраўдзівых звестак. Пастанавілі асудзіць яго на 2 гады і 6 месяцаў з накіраваннем у папраўчую ўстанову адкрытага тыпу і спагнаць па 300 і 500 рублёў пацярпелым, паведамляе Рэгіянальная газета.
Пачуўшы прысуд, людзі ў судовай зале скандавалі «Ганьба!»
Такім чынам патрабаванне дзяржаўнага абвінаваўцы задаволенае часткова. Прыгавор не ўступіў у законную сілу.
Максімальнае пакаранне, якое прадугледжвае артыкул 188 — абмежаванне свабоды тэрмінам да трох год. Менавіта такую санкцыю запатрабаваў дзяржаўны абвінаваўца, а таксама кампенсацыю пацярпелым у памеры 1000 рублёў кожнаму.
Улану паставілі ў віну тое, што ён распаўсюдзіў заведама непраўдзівыя звесткі, якія ганьбяць гонар і годнасць міліцыянераў. Пацярпелымі па справе праходзілі сямёра супрацоўнікаў Смаргонскага райаддзела міліцыі. Справу разглядаў суддзя Сяргей Боландзь, дзяржаўным абвінаваўцам выступіў Андрэй Клышэвіч.
24 верасня ў гарадской суполцы Укантакце «Чуткі Смаргонь» размясцілі пост з карцінкай з мультфільма «Том і Джэры», дзе кот адчыняе дзверы, у якія ўваходзіць некалькі іншых катоў. Зверху надпіс «Калі цябе пакрыўдзілі ў «Чутках» і ты завеш падтрымку». Зверху аўтар публікацыі напісаў: «Калі не абароняць, то хоць палайкаюць. Знаёма?».
Пад гэтым пастом Рамуальд Улан размясціў два каментары, за якія прадпрымальніка і прыцягнулі да адказнасці.
На судовым пасяджэнні Улан віну цалкам не прызнаў, хаця не адмаўляў, што фотаздымкі лістовак і подпісы размясціў ён.
Цяпер чытаюць
«У сына на тэлефоне былі налепленыя сцяг і герб Расіі. З гэтага ўсё пачалося». Бацька школьніка з Баранавіч расказаў, як яго сына цкавалі аднакласнікі26
Каментары