У «Белэкспа» адкрылася міжнародная выстава-кірмаш — з незалежнымі выдаўцамі ФОТЫ
У Мінску запрацавала міжнародная кніжная выстава-кірмаш — сёлета яна праходзіць 28-ы раз і збірае ўдзельнікаў з дваццаці краін замест мінулагодніх трыццаці. Цэнтральным «экспанентам» выступае СНД, а ЗША, што з’яўляліся цэнтральным экспанентам летась, гэтым разам нават не маюць асобнага нацыянальнага стэнда. Зрэшты як і шэраг еўрапейскіх краін. Тым не менш у гэтыя дні тут прадстаўлены замежныя, а таксама дзяржаўныя і незалежныя беларускія выдавецтвы, а сетка імпрэз уключае шэраг прэзентацый кніжных навінак і сустрэч з аўтарамі.
Асноўнымі арганізатарамі выставы-кірмаша выступаюць Міністэрства інфармацыі і Мінгарвыканкам. Як звычайна, яна ладзіцца ў будынку выставачнага цэнтра «Белэкспа» на праспекце Пераможцаў. Геаграфія краін, што прадстаўлены нацыянальнымі экспазіцыямі альбо асобнымі выдавецтвамі, амаль цалкам выключае краіны Еўропы: у выставе ўдзельнічаюць Кыргызстан, Сірыя, Таджыкістан, Казахстан, Турцыя, Ізраіль, Расія, Украіна, Германія ды іншыя. Слоган 28-й выставы — «Кніга аб'ядноўвае людзей і краіны».
Удзельнічаюць, вядома, і беларускія выдавецтвы. Сярод незалежных — «Галіяфы». Яго дырэктар Зміцер Вішнёў кажа, што ў працу выставы-кірмаша яны ўключаюцца толькі апошнія тры гады, а да гэтага іх сюды не пускалі.
«Рашэнне браць удзел у выставе перадусім усё ж эканамічнае, бо нам трэба выжываць і прадаваць свае кнігі, а адмовіцца значыла б адсячы сябе ад вялікай аўдыторыі. Мы выдалі некалькі навінак, у нас крэдыты ад літоўскіх партнёраў, трэба аддаваць грошы. Калі мы не будзем браць удзел у такіх выставах, то папросту вылецім у трубу. Да таго ж гэта праца выдавецтва: у нас выйшлі навінкі — нам трэба данесці іх да чытача, тут мы таксама адказныя за аўтараў».
На стэндзе «Галіяфаў» па ініцыятыве Польскага інстытута ў Мінску выстаўлены таксама кнігі выдавецтваў «Лімарыус», «Янушкевіч» і «Логвінаў», што былі выдадзены пры падтрымцы інстытута. У дні працы выставы тут запланаваныя аўтограф-сесіі Міколы Адама, Веранікі Ляўчук, Паўла Дарохіна, Паўла Міхалькевіча, Кірыла Стаселькі ды польскага аўтара Міхала Хабраса.
Побач з «Галіяфамі» размешчаны стэнд выдавецтва Arche — таго самага, выданні якога з’явіліся ў нядаўнім роліку МУС пад выглядам вынятай «экстрэмісцкай літаратуры».
«Мы маем вялікую гісторыю прызнання нашых выданняў экстрэмісцкімі, — кажа кнігавыдавец ды галоўны рэдактар часопіса Arche Валер Булгакаў. — Першым рэзананс атрымаў выпадак у 2007-2008 гадах, калі берасцейскі КДБ прызнаў адзін з нашых нумароў нелегальным. Але ўсе свае выданні мы робім, калі скарыстацца казённай фармулёўкай, ва ўстаноўленым законам парадку. Людзі, якія ў 2021 годзе выстаўляюць папяровыя выданні ўзорам экстрэмізму, мысляць у катэгорыях савецкай эпохі. Калі ў 1950-60 гадах кніга і магла быць разносчыкам іншадумства, то цяпер гэтая ідэя выглядае фантасмагарычна».
Выдавецтва Arche ўдзельнічае ў міжнароднай кніжнай выставе-кірмашы ўжо дзесяць гадоў.
«Па статыстыцы арганізатараў, кожны год выставу наведвае 25-30 тысяч чалавек. Гэта вялікая аўдыторыя і складаецца яна не толькі з мінчан: сюды прыязджаюць людзі з усёй краіны, мы з імі гутарым, а для кожнага выдавецтва важная зваротная сувязь. Губляць такую магчымасць з ідэалагічных прычын мы палічылі нявартым. Да таго ж на фоне трагічных падзей, якія адбываюцца ў краіне, гэта па-свойму някепскі знак, маўляў, суцэльнага задушэння фронту беларускамоўных культурніцкіх ініцыятыў не здарылася. Пасля беспрэцэдэнтнага наступу на беларускую культуру мы прыватна і публічна выказалі салідарнасць з выдавецтвамі, якія ад гэтага пацярпелі».
Выстава-кірмаш будзе працаваць да 21 лютага. Праз эпідэміялагічную сітуацыю стэнды ў выставачным комплексе размешчаны з улікам неабходнай дыстанцыі, а ў кожнага наведвальніка пры ўваходзе вымяраецца тэмпература.
Памілаваныя 15 чалавек, сярод якіх 13 палітвязняў15
Каментары