У верасні ХДС пойдзе на ўсеагульныя выбары без Ангелы Меркель.
Партыя Ангелы Меркель дасягае рэкордна нізкіх вынікаў у двух ключавых рэгіёнах на мясцовых выбарах у Германіі. Хрысціянска-дэмакратычнаму саюзу ёсць аб чым хвалявацца напярэдадні федэральных выбараў, прызначаных на канец верасня, піша ВВС.
ХДС набірае толькі чвэрць галасоў у паўднёва-ўсходніх землях Бадэн-Вюртэмберг і Рэйнланд-Пфальц. Традыцыйна іх жыхары актыўна галасавалі за партыю Меркель, хоць апошнія гады гэтымі рэгіёнамі кіравалі кааліцыі на чале з прадстаўнікамі зялёных і сацыял-дэмакратаў адпаведна. Цяперашнія кіраўнікі гэтых зямель, хутчэй за ўсё, застануцца на сваіх месцах.
У Бадэн-Вюртэмбергу кандыдат партыі Меркель прыкметна саступае прадстаўніку Зялёнай партыі Вінфрыду Крэчману. У Рэйнланд-Пфальцы — Малу Драер ад Сацыял-дэмакратаў.
Меркель сыходзіць з пасады федэральнага канцлера Германіі ў верасні пасля 16 гадоў на чале краіны.
Нізкія паказчыкі ХДС на цяперашніх рэгіянальных выбарах звязаныя з шэрагам прычын. Калі пасля першай хвалі пандэміі немцы лічылі дзеянні ўрада эфектыўнымі, то цяпер, на фоне росту новых выпадкаў заражэння і павольнай вакцынацыі, яны расчараваныя ў федэральных уладах. Алею ў агонь падлілі і навіны пра тое, што некалькі дэпутатаў партыі ХДС атрымалі буйныя камісійныя ад дзяржаўных кантрактаў на набыццё медыцынскіх масак.
Пры гэтым сама Ангела Меркель па-ранейшаму карыстаецца папулярнасцю ў краіне, паказваюць апытанні.
Апытанні грамадскай думкі паказваюць, што папулярнасць ХДС звалілася з 40% у чэрвені 2020-га, калі Германію хвалілі за эфектыўнасць барацьбы з каранавірусам, да 33% у сакавіку 2021-га.
У студзені партыя Меркель выбрала новага лідара — ім стаў цэнтрыст Армін Лашэт. Яго канкурэнтам на пасаду канцлера называюць Маркуса Зедэра, прэм'ер-міністра Баварыі. ХДС абяцае вызначыцца з кандыдатам у канцлеры ў канцы мая.
Каментары