Прэзідэнт ЗША Барак Абама 12 чэрвеня на год прадоўжыў дзеянне ўказа аб арышце ўласнасці "шэрагу асоб, якія падрываюць дэмакратычныя працэсы ў Беларусі", што знаходзіцца на тэрыторыі або пад юрысдыкцыяй ЗША
Як зазначае прэс-служба Белага дома, Абама накіраваў адпаведнае паведамленне, у тым ліку ў Кангрэс ЗША, у якім адзначыў наяўнасць "некаторых пазітыўных змяненняў за мінулы год" у Беларусі.
У прыватнасці, ён звярнуў увагу на вызваленне ўсіх міжнародна прызнаных палітычных зняволеных. "Але нягледзячы на гэта, дзеянні і палітыка пэўных членаў урада і іншых людзей, якія падрываюць дэмакратычныя працэсы, парушаюць правы чалавека і ўцягнутыя ў дзяржаўную карупцыю, маюць надзвычайную пагрозу нацыянальнай бяспецы і міжнароднай палітыцы ЗША. Па гэтых прычынах я вырашыў, што неабходна прадоўжыць дзеянне ўказа аб блакіраванні ўласнасці", — гаворыцца ў дакуменце.
Указ аб фінансавых санкцыях у дачыненні да дзесяці беларускіх чыноўнікаў быў падпісаны папярэднім прэзідэнтам Джорджам Бушам 16 чэрвеня 2006 года і з таго часу прадаўжаецца штогод.
Указ блакіруе ўласнасць гэтых чыноўнікаў і іх права на ўласнасць у ЗША, рахункі і магчымасць фінансавых аперацый. Амерыканскім кампаніям і прыватным асобам забаронена заключаць здзелкі з гэтымі службовымі асобамі.
Да ўказа прыкладаецца спіс з дзесяці прозвішчаў, у іх ліку — прэзідэнт Аляксандр Лукашэнка і яго сын Віктар Лукашэнка, намеснік кіраўніка Адміністрацыі прэзідэнта Наталля Пяткевіч, міністр юстыцыі Віктар Галаванаў, старшыня Белдзяржтэлерадыёкампаніі Аляксандр Зімоўскі, кіраўнік Цэнтрвыбракама Лідзія Ярмошына.
У спіс таксама ўваходзяць асобы, якія на гэты час пазбавіліся сваіх пасадаў, — гэта былыя старшыня КДБ Сцяпан Сухарэнка, дзяржсакратар Савета бяспекі Віктар Шэйман, міністр унутраных спраў Уладзімір Навумаў і камандзір брыгады спецназу ўнутраных войскаў МУС Дзмітрый Паўлічэнка.
Цяпер чытаюць
Бетанаваць грошы — нацыянальная ідэя беларусаў? Параўналі тэмпы будаўніцтва ў Беларусі, Польшчы, Літве і Латвіі10
Каментары