У Пружанах распачата крымінальная справа ў дачыненні да маладой маці, якая на некалькі сутак пакінула без нагляду сваю дзевяцімесячную дачку.
Як паведаміў БелаПАН супрацоўнік следчага аддзялення Пружанскага РАУС Алег Міклашэвіч, справа распачата па ч. 3 арт. 159 Крымінальнага кодэкса (пакіданне ў небяспецы), які прадугледжвае пакаранне ў выглядзе арышту на тэрмін да шасці месяцаў або пазбаўлення волі да трох гадоў.
19‑гадовая непрацуючая жыхарка вёскі Лінава Пружанскага раёна
28 красавіка пайшла з дому, пакінуўшы без дагляду сваю дачку. 30 красавіка дзіця ў незапёртым доме знайшлі суседзі. Дзяўчынка была шпіталізаваная з дыягназам «знясіленне»ў Пружанскую цэнтральную раённую бальніцу. Пры норме 9 кг яна важыла 6 кг. У пачатку чэрвеня пасля праведзенага лячэння дзяўчынку перавялі ў Пінскі дом дзіцяці.
Маці дзіцяці з’явілася дома 3 мая. З яе слоў, яна «хадзіла да сябровак».
Жанчына не замужам, гэта яе першае дзіця. На ўліку ў наркалагічнай службе не знаходзіцца. Жыве разам са сваёй маці, якая злоўжывае спіртнымі напоямі. Бабуля дзевяцімесячнай унучкі гэтымі днямі таксама адсутнічала.
Як зазначыў Міклашэвіч, гэта першая такая крымінальная справа, распачатая ў Пружанскім раёне.
З жанчыны ўзята падпіска аб нявыездзе. Вырашаецца пытанне аб пазбаўленні яе бацькоўскіх правоў.
Каментары