Паслухайце, як навукоўцы ператварылі павуціну ў музыку
Амерыканскія навукоўцы з Масачусецкага тэхналагічнага інстытута напісалі музыку на аснове структуры павуціны — атрымаўся саўндтрэк для фільма жахаў.
Жудасныя мелодыі гучаннем нагадваюць арфу, піша CNN.
Доктар філасофіі Маркус Бюлер, адзін са стваральнікаў праекта, даўно задумваўся пра тое, каб атрымаць мелодыі з прыродных матэрыялаў, напрыклад, з павуціны.
Нягледзячы на тое, што сетка павуціння выглядае выпадковай, у ёй ёсць мноства ўнутраных структур, недасяжных чалавечаму воку. Аднак усе структурныя дэталі павуціны можа зразумець камп’ютар.
Павукі ўспрымаюць навакольны свет праз вібрацыі нітак іх павуціны, з дапамогай якіх яны арыентуюцца і маюць зносіны з іншымі павукамі. Таму музыка іх павуціны дае магчымасць уявіць, як павукі ўспрымаюць свет.
Разам са сваімі калегамі Бюлер прасканаваў павуціну з дапамогай лазера. Таксама навукоўцы фіксавалі вібрацыі сеткі, якія ўзнікалі падчас руху павукоў.
Даследчыкі зрабілі здымкі двухмерных сячэнняў павуціны, пасля чаго выкарысталі камп'ютарныя алгарытмы для ўзнаўлення віртуальнай 3D-сеткі павуціны.
Затым навукоўцы надавалі кожнай нітцы павуціння пэўную частату гуку, і такім чынам атрымліваліся ноты, якія даследчыкі ператварылі ў мелодыі.
Для выканання музыкі павукоў навукоўцы стварылі віртуальны музычны інструмент, падобны да арфы.
Каментары