Ці дастаткова проста спаласнуць бутэльку для вады? Спецыялісты тлумачаць, чаму гэта небяспечная звычка

Нават калі ў бутэльку наліваюць толькі звычайную ваду, яе неабходна мыць кожны дзень. Як тлумачаць эксперты нямецкага Цэнтра абароны правоў спажыўцоў зямлі Паўночны Рэйн — Вестфалія ў каментары Нямецкаму інфармацыйнаму агенцтву (dpa), праз рот, рукі і паветра ў ёмістасць пастаянна трапляюць бактэрыі, грыбкі і дрожджы.

У вільготным асяроддзі яны могуць хутка размнажацца і ўтвараць біяплёнку — устойлівы слой мікраарганізмаў на ўнутранай паверхні бутэлькі. Некаторыя з гэтых мікраарганізмаў здольныя выклікаць страўнікава-кішачныя расстройствы.

Асабліва шмат забруджванняў можа назапашвацца ў месцах, якія цяжка прамыць: на носіках, ушчыльняльніках і ў трубачках для піцця. Таму проста спаласнуць бутэльку чыстай вадой недастаткова, бо такім чынам немагчыма выдаліць усе мікраарганізмы.

Як правільна мыць бутэльку

Эксперты раяць штодня мыць ёмістасць гарачай вадой са сродкам для мыцця посуду, выкарыстоўваючы спецыяльны ёршык. Для носікаў, трубачак і іншых цяжкадаступных дэталяў могуць спатрэбіцца маленькія шчоткі.

Пасля мыцця бутэльку трэба старанна спаласнуць і цалкам высушыць. Лепш паставіць яе ўверх дном, каб рэшткі вады маглі сцячы. Калі ўнутры застаецца вільгаць, мікраарганізмы могуць працягваць размнажацца.

Таблеткі для чысткі і пасудамыйная машына

Для дадатковай ачысткі можна выкарыстоўваць спецыяльныя таблеткі, падобныя да сродкаў для чысткі зубных пратэзаў. Яны дапамагаюць разбураць біяплёнку і абалонкі бактэрый. Аднак пасля іх выкарыстання бутэльку ўсё роўна неабходна пачысціць ёршыкам і добра прамыць.

А вось спецыяльныя шарыкі для чысткі, якія трэба трэсці ўнутры ёмістасці, менш эфектыўныя. Яны могуць выдаляць налёт са сценак, але не забяспечваюць належнай ачысткі носікаў, трубачак і ўшчыльняльнікаў.

Бутэльку таксама можна мыць у пасудамыйнай машыне, калі гэта дазваляе вытворца. Пры гэтым адтуліна павінна быць дастаткова шырокай, каб вада добра трапляла ўнутр. Эксперы рэкамендуюць размяшчаць ёмістасць уверх дном у ніжнім кошыку, дзе струмень вады мацнейшы. Здымныя дэталі варта мыць асобна.

Калі бутэльку лепш замяніць

У шматразовых бутэлек няма строга вызначанага тэрміну выкарыстання. Эксперты раяць арыентавацца на іх стан: калі на паверхні з'явіліся драпіны, расколіны або іншыя пашкоджанні, у іх лягчэй назапашваюцца мікраарганізмы, якія складана выдаліць падчас мыцця. Таму моцна зношаную ёмістасць лепш больш не выкарыстоўваць.

Замяніць бутэльку варта і тады, калі нават пасля стараннай ачысткі застаюцца непрыемны пах або налёт, які не ўдаецца выдаліць.

• 5
• 0
• 0
• 2
• 0
• 0
• 0
• 0