Трагедыя ледзь не здарылася ў Маладзечанскім раёне.
Родную і стрыечную сясцёр 2001 і 2002 гадоў нараджэння выратавала з палаючага дома 12‑гадовая дзяўчынка ў ноч з 13 на 14 ліпеня ў вёсцы Такарэўшчына Алёхнавіцкага сельсавета, што ў Маладзечанскім раёне.
Дзеці адпачывалі на дачы на канікулах, расказала у інтэрв’ю «РГ» інспектар групы прапаганды і навучання гаррайаддзела па надзвычайных сітуацыях Марына Ермакова. Самай старэйшай з дзяўчынак — 12 гадоў. Яе маці была на рабоце ў сталіцы, бацька паклаў сваіх дачок і пляменніцу спаць, сказаўшы ім, што ноччу ад’едзе на гадзінку, каб завезці сябра ў Мінск.
…Трэск шыферу пачула суседка. Яна выйшла на вуліцу і ўбачыла ў цэнтры вёскі зарыва. Яшчэ не разумеючы, што там гарыць, жанчына пазваніла па 101.
У гэты час старэйшая з сясцёр прачнулася. Як пасля расказвала дзяўчынка, сама не ведае, чаму. Убачыла, што пакой задымлены. Разбудзіла сясцёр. Шлях да выхаду з дому дзяўчынкам перагарадзіў агонь. Загарэліся ўваходныя дзверы.
Старэйшая не разгубілася. Адкрыла акно і спачатку дапамагла вылезці з дома малодшым сястрычкам, потым выратавалася сама.
Калі дзеці былі ў бяспецы, прыехалі пажарныя, вярнуўся з Мінска бацька. Па словах Марыны Ермаковай, дзяўчынкі казалі, што адчуваюць сябе добра. Але пазней, калі прайшоў шок і яны зразумелі, што маглі загінуць, пачалі плакаць.
Не мог стрымаць слёз дзядуля дзяўчынак. Ён расказаў, што літаральна за пару дзён да здарэння ў доме знялі падвойныя вокны. Страшна ўявіць, што магло здарыцца, каб гэтага не зрабілі…
«Дом згарэў амаль да падмурка, — кажа Марына Ермакова, — папярэдняя прычына пажару — няспраўнасць электраправодкі на верандзе.
Мне б вельмі хацелася чарговы раз папрасіць бацькоў: не пакідайце дзяцей дома адных нават на непрацяглы час. Калі не дзіцячае свавольства, то любая няшчасная выпадковасць можа стаць прычынай непапраўнай трагедыі».
Цяпер чытаюць
Ніводзін лукашэнкаўскі СМІ і канал не выкарыстаў слова «рэтранслятары». Што гэта можа азначаць?26
Каментары