Раман Пратасевіч знік з інфапрасторы. Сафія Сапега больш не знаходзіцца з ім, з ёй няма сувязі
У канцы мая ў Мінску затрымалі блогера Рамана Пратасевіча і яго дзяўчыну Сафію Сапегу. Нягледзячы на арышт, малады чалавек даў некалькі інтэрв'ю, стаў удзельнікам прэс-канферэнцыі, ажывіў свой Twitter і завёў телеграм-канал, у якім абяцаў «каштоўныя інсайды». У пачатку восені Раман знік з медыярадараў. Яго Twitter маўчыць з 18 жніўня, а апошні запіс у телеграм-канале быў зроблены 9 верасня. Што цяпер з ім адбываецца і чаму ён застаўся адзін, яго мама Наталля распавяла блогу «Отраженіе».
Дзе менавіта знаходзіцца Раман, мама не ведае. Усё, што ёй вядома: ён пад хатнім арыштам і сталым наглядам. Сафія адразу знаходзілася разам з ім, але некалькі тыдняў таму яе перавезлі. Куды? Наталля не ў курсе.
— Перыядычна мы звязваемся з сынам у тэлеграме. Калі я бачу, што ён у сетцы, тэлефаную яму. Калі яму дазваляюць, ён падымае, — распавядае мама. — Быў час, у яго на два тыдні забралі інтэрнэт. Мы не ведалі, куды ён знік, нават ежу перадаць не маглі. Добра, што з ім была Соня, і яны праз яе карту маглі нешта замовіць.
Ежу Раману перадае сястра, якая жыве ў Мінску. Брат папярэджвае: куды і калі ёй прынесці пакеты, і пэўныя людзі іх забіраюць. Спаткання з сястрой, працягвае Наталля, Раману не дазваляюць.
— Мабыць, у яго там ёсць магчымасць гатаваць, таму дачка перадае яму пельмені, сасіскі, макароны. Прынесла яму шмат кніг, — апісвае сітуацыю суразмоўніца. — Дачка — студэнтка, вучыцца на дзённым. Цяпер ёй прыйшлося знайсці падпрацоўку. Усё лягло на яе плечы. У Мінску ў мяне бацькі, але яны інваліды. Цяжка перанеслі каранавірус. У мужа два тыдні таму ад COVID-19 памёр тата. Ён вельмі цяжка перажывае, бо не змог нават паехаць пахаваць бацьку.
— У якіх умовах жыве Раман?
— Не ведаю, на прагулкі яму не дазволена. Калі раней падчас следчых дзеянняў ён мог пабыць хоць бы ў дворыку Следчага камітэта, то ўжо каля чатырох месяцаў ён проста сядзіць без права выхаду.
Наколькі вядома, следчых дзеянняў з Раманам у апошні час не праводзіцца.
Чаму сын перастаў весці Twitter і тэлеграм, маме не ведае.
— Як Раман сябе адчувае?
— Калі мы размаўляем, ён часта кажа: «Мама, я ўяўляю, што я на падводнай лодцы». Выхаду няма, звязацца ні з кім [нельга]. Сядзіць і сядзіць у замкнёнай прасторы, таму вельмі цяжка. Мы спадзяваліся, што ICAO і Ryanаir дадуць нейкую інфармацыю пра тое, што там здарылася. Як, чаму? Але ні-чо-га.
Родныя Сафіі кажуць, што яна таксама знаходзіцца пад хатнім арыштам. Апошні званок ад яе быў месяц таму. [З таго часу] сувязь у нас з ёй адсутнічае. З чым гэта звязана, не ведаем. Запыт у Следчы камітэт мы зрабілі, атрымалі адказ, што сувязь са знешнім светам для яе пакуль пад забаронай, — распавядаюць блізкія дзяўчыны. — Яна абмежаваная ў тэлефонных званках і асабістых сустрэчах. З ёй усё нармальна… напэўна.
— Вы не ведаеце, чаму арышт яны цяпер адбываюць не разам з Раманам?
— Абсалютна [не ведаю], не магу нічога сказаць.
Цяпер чытаюць
Беларус зрабіў прапанову каханай каля знакамітага фантана Трэві ў Рыме — пад апладысменты дзясяткаў турыстаў6
Каментары