«Ад 60 да 65 гадоў». У якім узросце сыходзяць на пенсію ў суседніх краінах
У Беларусі з 1 студзеня павышаюць пенсійны ўзрост: для жанчын да 58 гадоў, а для мужчын — да 63. Павышаць век выхаду на пенсію пачалі ў 2017-м, да гэтага часу мужчыны сыходзілі на пенсію ў 60 гадоў, жанчыны ў 55 гадоў. Затым кожныя паўгода ўзрост выхаду таксама рос на шэсць месяцаў.
А вось у суседзяў збольшага плануецца павысіць час выхаду на пенсію да 65 гадоў. Але ёсць краіна, дзе ўзрост складаў 67 гадоў і быў зніжаны. Гэта Польшча, у 2017-м там мужчыны і жанчыны сыходзілі на пенсію ў 67, але кіроўная партыя ўзрост знізіла, і цяпер мужчыны сыходзяць у 65, а жанчыны ў 60. Эканоміка дазваляе.
У Расіі ў 2022 годзе мужчыны будуць выходзіць на пенсію ў 61,5 года, жанчыны — у 56,5 года (цяпер 61 і 56). Мяркуецца, што да 2028 года гэты ўзрост складзе 65 і 60 гадоў адпаведна.
Украінскія мужчыны і жанчыны сыходзяць на пенсію сінхронна — у 60 гадоў. Але там крыху іншая сістэма. Таксама трэба мець працоўны стаж: каб сысці ў 60 гадоў, трэба мець 29 гадоў стажу, а калі ў 65 гадоў — мінімум 19 гадоў.
У Літве наадварот пенсійны узрост павялічваецца. Цяпер ён складае 64 гады і два месяцы для мужчын, і 63 гады і 4 месяы для жанчын. У наступным годзе яго павялічаць на два месяцы, і ў 2025-м зраўняюць для абодвух палоў да 65 гадоў.
У Латвіі для мужчын і жанчын аднолькавы пенсійны ўзрост — 64 гады. З 1 студзеня 2022 года ён вырасце на тры месяцы. Кожны наступны год таксама будзе расці на тры месяцы, пакуль не дасягне ў 2025-м 65 гадоў.
Цяпер чытаюць
Стала вядома, што за 200 тысяч еўра прапаноўвалі Сяргею Ціханоўскаму «беларускія бізнэсмены»23
Каментары