Праваабарончая арганізацыя: стандарты справядлівага судовага разгляду ў дачыненні да Бабарыкі былі парушаныя
Праваабарончая арганізацыя «Фонд Клуні за справядлівасць» (Clooney Foundation for Justice) апублікавала справаздачу аб судовым працэсе па справе Віктара Бабарыкі. У ёй робіцца выснова, што стандарты справядлівага судовага разгляду ў дачыненні да Бабарыкі былі парушаныя.
Аналіз фактаў дазволіў маніторынгавай місіі зрабіць высновы пра парушэнне такіх правоў Віктара Бабарыкі, як:
- права на доступ да абаронцы да суда;
- права быць інфармаваным пра сутнасць прад'яўленых абвінавачванняў;
- права быць асуджаным кампетэнтным, незалежным і бесстароннім судом;
- права на прэзумпцыю невінаватасці;
- права на дастатковы час і ўмовы для падрыхтоўкі да абароны;
- права выкліку і допыту сведак.
Зыходзячы з праведзеных назіранняў і інфармацыі, якія прагучала ў судовых пасяджэннях, у справаздачы канстатаваная прадвызначанасць вынікаў працэсу і пакаранне за ўдзел Бабарыкі ў выбарчай кампаніі.
Маніторынгавая місія зрабіла выснову, што сукупны шэраг парушэнняў у ходзе працэсу аказаў негатыўны ўплыў на справядлівасць судовага разгляду па справе Бабарыкі, што ў рэшце рэшт магло стаць істотным фактарам яго асуджэння.
На аснове праведзенага назірання і выяўленых парушэнняў аўтары справаздачы адзначаюць:
«Палітычны кантэкст у спалучэнні з апісанымі парушэннямі прыводзіць нас да вельмі сур'ёзных асцярогаў, што абвінавачванне і суд над спадаром Бабарыкам былі выкліканыя неналежнымі матывамі, што ўяўляе сабою злоўжыванне працэсам».
«Фонд Клуні за справядлівасць» (Clooney Foundation for Justice) заснаваны галівудскім акцёрам Джорджам Клуні і ягонай жонкай — юрысткай Амаль Клуні. Адной з ініцыятываў фонду з'яўляецца TrialWatch — маніторынг крымінальных судовых працэсаў у розных краінах з мэтай выкрыцця несправядлівасці і прасоўвання вяршэнства права.
Поўны тэкст справаздачы на англійскай мове даступны тут.
Каментары