ЕС не будзе накіроўваць місію для назірання за рэферэндумам у Беларусі
Еўрасаюз не збіраецца накіроўваць назіральнікаў у Беларусь на рэферэндум па ўнясенні змяненняў у канстытуцыю, які павінен прайсці 27 лютага, паведаміў афіцыйны прадстаўнік еўрапейскай знешнепалітычнай службы Пітэр Стана.
«Мы канстатавалі, што беларускія ўлады не запрасілі Бюро па дэмакратычных інстытутах і правах чалавека АБСЕ разгарнуць місію па назіранні ў Беларусі. ЕС, са свайго боку, таксама не плануе накіроўваць афіцыйную місію па назіранні за галасаваннем у Беларусь», — сказаў Стана.
Пры гэтым ён адзначыў, што грамадзяне Еўрасаюза могуць адправіцца ў гэтую краіну для назірання за рэферэндумам, але «будуць рабіць гэта ў прыватным парадку».
ЕС, па словах Стана, працягне сачыць за развіццём падзей. «Мы працягнем адсочваць развіццё падзей у Беларусі да рэферэндуму і ў дзень галасавання і адпаведна адрэагуем», — сказаў ён.
Паводле апошніх даных ЦВК, камісіямі па рэферэндуме ўжо акрэдытаваныя 39 909 нацыянальных назіральнікаў. Большасць назіральнікаў (29 336) прадстаўляюць грамадскія аб'яднанні: прафесійныя саюзы, якія ўваходзяць у ФПБ (8906), БРСМ (4674), «Белая Русь» (4628), «Беларускі саюз жанчын (3903).
Палітычныя партыі накіравалі ў камісіі па рэферэндуме 1557 назіральнікаў, большасць з іх (989) — ад Камуністычнай партыі Беларусі.
Працоўныя калектывы накіравалі 3370 назіральнікаў, грамадзяне — 5646.
Акрамя таго, Цэнтральнай камісіяй акрэдытаваны 101 міжнародны назіральнік. 92 прадстаўляюць місію назіральнікаў ад СНД, у тым ліку 14 накіраваныя Міжпарламенцкай Асамблеяй дзяржаў — удзельніц СНД, таксама 8 назіральнікаў акрэдытаваныя ад цэнтральных выбарчых камісій Азербайджана, Арменіі, Расіі, Таджыкістана, 1 — ад Шанхайскай арганізацыі супрацоўніцтва, піша Zerkalo.io.
Гэтая дзяўчына выйшла ў цэнтры Гродна з плакатам «Не вайне». Яна расказала, што перажыла пасля12
Каментары