Украінскія дэсантнікі знішчылі дзве марскія брыгады. Пуцін пасля гэтага надаў ім званне гвардзейскіх
На поўдні Украіны адна з асобных дэсантна-штурмавых брыгад Узброеных сіл Украіны знішчыла падраздзяленне з Перавальнага (Крым), паведамілі ўкраінскія СМІ.
Асаблівасць сітуацыі ў тым, што да 2014 года ў Перавальным базавалася былая 36-я брыгада марской пяхоты Украіны, укамплектаваная пераважна жыхарамі Крыма, і некаторых з іх адправілі ваяваць супраць Узброеных сіл Украіны. У расійскай арміі яна мае нумар 126.
«Здраднікі знішчаныя, цяпер яны 200-я (загінулыя) з 126-й брыгады берагавой абароны Чарнаморскага флота РФ», — гаворыцца ў паведамленні ўкраінскіх Узброеных сіл.
Знішчаная таксама варожая вайсковая тэхніка.
Украінцы нанеслі моцныя ўдары па марской пяхоце Расіі, калі тая высаджвалася на поўдні Украіны. Паводле інфармацыі заходніх разведак, дзве брыгады марской пяхоты і берагавой аховы сапраўды былі практычна цалкам знішчаныя ўкраінскім агнём. Загінуў у тым ліку намеснік камандуючага Чарнаморскім флотам.
Сёння Крэмль надаў 126-й брыгадзе берагавой аховы і 155-й асобнай брыгадзе марской пяхоты званне гвардзейскіх. Гэта рэдкі крок, які вылучае часці, што асабліва адзначыліся.
Каментары