На Балі выкралі і забілі сына ўкраінскага крымінальнага бізнэсмена. За яго жыццё патрабавалі $10 мільёнаў

Ігар Камароў знік 15 лютага. У той дзень ён разам з сябрамі катаўся на матацыклах у раёне Джымбаран на поўдні Балі. У нейкі момант дарогу ім перагарадзіла група людзей на аўтамабілі і матацыклах. Камарова схапілі і сілай вывезлі.

Паводле паведамленняў СМІ, разам з ім быў яшчэ адзін украінец — Ярмак Пятроўскі. Але яму нібыта ўдалося ўцячы падчас нападу.

Праз некалькі дзён пасля выкрадання ў інтэрнэце з’явілася відэа з Камаровым. На роліку моцна збіты хлопец прасіў бацькоў заплаціць 10 мільёнаў даляраў выкупу.

На відэа мужчына сцвярджаў, што яго катуюць. У некаторых паведамленнях сцвярджалася, што выкрадальнікі адрэзалі яму некалькі пальцаў, каб прымусіць родных заплаціць грошы.

У сацыяльных сетках і ў шэрагу медыя з’явілася інфармацыя, што за выкраданнем могуць стаяць чачэнцы, звязаныя з крымінальнымі структурамі.

Афіцыйна паведамляецца, што Камароў і Пятроўскі — сыны вядомых у Дняпры бізнэсменаў. У той жа час у некаторых медыя іх бацькоў небеспадстаўна называлі крымінальнымі аўтарытэтамі.

Некаторыя СМІ пісалі, што абодва мужчыны могуць мець дачыненне да дзейнасці махлярскіх кол-цэнтраў у Дняпры, якія працуюць супраць грамадзян Расіі.

26 лютага на пляжы Кетэвел у акрузе Гіаньяр на ўсходнім узбярэжжы Балі мясцовыя жыхары знайшлі чалавечыя парэшткі — галаву, часткі тулава, рукі і ногі. Цела знаходзілася ў стане моцнага раскладання. Экспертыза паказала, што смерць наступіла прыкладна за тры дні да знаходкі. Візуальна вызначыць асобу было немагчыма.

Парэшткі даставілі ў бальніцу, пасля чаго следчыя накіравалі ўзоры костак у Нацыянальны цэнтр крыміналістычнай экспертызы ў Джакарце. Інданезійская паліцыя супрацоўнічала з украінскім консульствам і ўзяла генетычны ўзор у маці Камарова, каб параўнаць яго з ДНК знойдзеных парэшткаў.

4 сакавіка прадстаўнік паліцыі паведаміў, што ўзоры касцявой тканкі цалкам супалі з ДНК бацькоў Ігара Камарова.

Падчас расследавання паліцыя таксама знайшла сляды крыві на віле ў акрузе Табанан і ў аўтамабілі Toyota Avanza, які, як мяркуецца, выкарыстоўвалі выкрадальнікі. Генетычная экспертыза паказала, што яны супадаюць з ДНК маці Камарова. Гэта дазволіла следчым выказаць здагадку, што мужчыну маглі ўтрымліваць на віле перад смерцю і перавозіць у гэтым аўтамабілі.

Інданезійская паліцыя паведаміла, што па справе ўжо затрыманы адзін падазраваны — мужчына з ініцыялам C, якога арыштавалі ў правінцыі Заходняя Нуса-Тэнгара. Паводле следства, ён арандаваў аўтамабіль па падробленым пашпарце. Менавіта гэтая машына, як мяркуецца, была выкарыстана падчас выкрадання.

Сам затрыманы сцвярджае, што не ведаў пра злачынныя намеры і нібыта проста арандаваў аўто па просьбе іншых людзей за ўзнагароду ў 6 мільёнаў інданезійскіх рупій (каля 350 даляраў).

Яшчэ шэсць замежных грамадзян названыя падазраванымі. Іх пазначылі ініцыяламі RM, VK, AS, VN, SM і DH. Іх абвясцілі ў міжнародны вышук, а інданезійская паліцыя звярнулася да Інтэрпала з просьбай выдаць чырвоныя ордары на іх арышт.

Паводле следства, чатыры падазраваныя ўжо пакінулі Балі, яшчэ двое могуць знаходзіцца на тэрыторыі Інданезіі.

Паліцыя адзначае, што расследаванне працягваецца. Следчыя спрабуюць вызначыць ролю кожнага з падазраваных і высветліць дакладны матыў выкрадання і забойства.

• 4
• 1
• 3
• 6
• 13
• 2
• 6
• 0