Аляксандр Лукашэнка і Дзмірый Мядзведзеў сустрэнуцца 27 жніўня ў Сочы.
У адпаведнасці з дасягнутымі раней дамоўленасцямі 27 жніўня ў Сочы адбудзецца сустрэча прэзідэнтаў Беларусі і Расіі.
Як паведамляе прэс‑служба кіраўніка беларускай дзяржавы, Аляксандр Лукашэнка і Дзмітрый Мядзведзеў абмяркуюць «шырокі спектр пытанняў двухбаковага супрацоўніцтва, а таксама актуальныя праблемы міжнароднага парадку дня».
У ліку найбольш важных тэм — гандлёва‑эканамічныя адносіны, ход саюзнага будаўніцтва, сумесныя меры па пераадоленні негатыўнага ўплыву сусветнага фінансава‑эканамічнага крызісу, пытанні забеспячэння бяспекі абедзвюх краін, узгодненыя дзеянні ў знешняй палітыцы.
Нагадаем, аб плануемай сустрэчы з Дзмітрыем Мядзведзевым у Сочы Аляксандр Лукашэнка паведаміў журналістам 20 жніўня падчас рабочай паездкі ў Віцебскую вобласць.
Паводле яго слоў, дамоўленасць аб сустрэчы з расійскім прэзідэнтам была дасягнута падчас нефармальнага саміта краін — удзельніц АДКБ, які праходзіў 31 ліпеня — 1 жніўня ў Кыргызстане. Лукашэнка зазначыў, што падчас сустрэчы плануецца абмеркаваць «увесь спектр складаных пытанняў — тых, якія дагэтуль не вырашаюцца».
«Для мяне самае галоўнае — зыходзіць з прынцыпу: дамовіліся — давайце выконваць. Гэта галоўнае, больш нічога не трэба», — сказаў Лукашэнка.
У 2009 годзе Лукашэнка і Мядзведзеў сустракаліся ў фармаце «сам‑насам» чатыры разы:
3 лютага падчас пасяджэння Вышэйшага дзяржсавета Саюзнай дзяржавы Беларусі і Расіі ў Маскве, 19 сакавіка — у Завідаве (Цвярская вобласць), 21 сакавіка — у Чырвонай Паляне пад Сочы і 10 красавіка — у падмаскоўных Горках.
Каментары