Уначы чуліся шматлікія выбухі ў раёне аэрадрома «Зябраўка» пад Гомелем. Мінабароны: Адбылося ўзгаранне тэхнікі
Тэлеграм-канал «Беларускі гаюн» уначы паведаміў, што ў раёне аэрадрома «Зябраўка» пад Гомелем, дзе базуюцца расійскія войскі, былі чуваць выбухі і відаць успышкі. Мінабароны заявіла, што адбылося ўзгаранне адной з адзінак тэхнікі.
Паводле папярэдняй інфармацыі, пачынаючы з 00:25 да 00:32 былі відаць мінімум 8 успышак.
Інфармацыю пацвердзілі чытачы гомельскага выдання «Флагшток»:
«З 00:25 па 00:32 былі чутныя выбухі, адчувалася [ударная] хваля, пару разоў праз суцэльную воблачнасць [былі бачныя] светлавыя пробліскі. Напрамак — Зябраўскі аэрадром».
У Зябраўцы ад зімы гэтага года базавалася расійская авіяцыя і ракетныя комплексы, якія выкарыстоўваліся для ўдараў па Украіне. Паведамлялася, што ў пачатку гэтага месяца ў тым раёне назіралі перавозку ракет для комплексаў С-300 або С-400.
Зябраўка знаходзіцца за 10 км ад Гомеля, за 50 км ад украінскай мяжы.
Раней Міністэрства абароны анансавала на 9—11 жніўня вучэнні сіл супрацьпаветранай абароны на тэрыторыі Беларусі.
Мінабароны раніцай пацвердзіла факт здарэння ў Зябраўцы.
«У сувязі з надыходзячымі ў Міністэрства абароны зваротамі аб успышках на ўчастку мясцовасці Зябраўка Гомельскай вобласці, паведамляем, што 10 жніўня каля 23 гадзін падчас кантрольнага прабегу адной з адзінак тэхнікі пасля праведзенай замены рухавіка адбылося яе ўзгаранне. Асабовым складам своечасова прынятыя меры па тушэнні. Пацярпелых няма».
Цяпер чытаюць
«Беларусь перадусім». Што вядома пра 23‑гадовага афіцэра спецназа, якога асудзілі на 19 гадоў за «здраду дзяржаве»18
Каментары