Восень — час, калі прынята брацца за вучобу, напрыклад, нарэшце падцягнуць англійскую мову. Сабралі для вас асноўную інфармацыю пра тое, колькі гэта можа вам каштаваць.
Мінск
Відавочны шлях для тых, хто шукае ўрокі па замежнай мове, — гэта звярнуцца да прыватных курсаў. У папулярнай мінскай школы Streamline, якая таксама мае філіялы ў абласных цэнтрах, цэны на курсы для дарослых па англійскай і польскай мовах пачынаюцца ад 352 рублёў за 8 тыдняў заняткаў удзень, калі жадаеце хадзіць увечары, кошт складзе 392 рублі. Падлеткавыя курсы англійскай каштуюць у Streamline 344 рублі.
Трохі танней абыдзецца англійская (а таксама іспанская і нямецкая мовы) — 336 рублёў — за ўсё той жа семестр памерам у 160 акадэмічных гадзін. У дзяцей, праўда, цэны параўнальныя: ад 298 рублёў за меншы па памерах семестр — 140 акадэмічных гадзін.
У школе Foreign language centre месяц заняткаў для дарослых каштуе ад 184 рублёў, для дзяцей — ад 136 рублёў. Ці паспрабуйце школу RealWay, дзе цэны на курсы для дарослых стартуюць ад 144 рублёў за месяц, для дзяцей — ад 64 рублёў.
Нарэшце, можна звярнуцца і ў дзяржаўныя ўстановы. Папулярныя, напрыклад, курсы ў «інязе» (МДЛУ). Аплата ў іх ідзе адразу за ўвесь семестр (4 месяцы), і каштуе ён 470 рублёў, што больш выгадна ў параўнанні з прыватнымі школамі.
Абласныя цэнтры
У рэгіёнах цэны на курсы англійскай мовы прадказальна ніжэйшыя. Так, месяц заняткаў у Брэсце двойчы на тыдзень абыдзецца вам у сярэднім ад 100 рублёў — як мінімум, такія цэны прапануюць школы «Одиссея знаний» і International Language House. Праўда, у гэтым выпадку вы плаціце за заняткі, што доўжацца 80 хвілін.
Ёсць у Брэсце школа, якая прапануе курсы па сярэдняй цане ад 60 рублёў на месяц, — «Нью-Тон». Заняткі ў ёй доўжацца толькі гадзіну, і ніхто не гарантуе, што колькасць вучняў у групе будзе неяк абмежаваная, але калі трэба сэканоміць, гэта добры варыянт.
Ад 104 рублёў на месяц стартуюць цэны ў гомельскай школе англійскай мовы Mr. Language. Ёсць у Гомелі і больш дарагія курсы, напрыклад, школа The English Company прапануе заняткі па цане 128 рублёў на месяц, але пры гэтым вам абяцаюць групу да 6 чалавек, эфектыўную праграму з Оксфарда і выкладчыка-эксперта.
Трохі ніжэйшыя цэны можна знайсці ў магілёўскай школе «Профі». Так, адзін занятак працягласцю ў стандартныя 80 хвілін абыдзецца тут у 12 рублёў, што дае прыкладна 96 рублёў на месяц. Гатовы заплаціць больш? Магілёўская школа замежнай мовы «Аспект» просіць ад 186 рублёў за 6 тыдняў англійскай мовы для дарослых, і гэта не проста так: школа працуе з 2001 года, а яе выкладчыкі, як паведамляецца на сайце школы, маюць міжнародныя сертыфікаты, што пацвярджаюць іх кваліфікацыю.
У некаторых беларускіх моўных школах можна знайсці вельмі нечаканыя тэхнікі вывучэння мовы. Так, гродзенская моўная студыя Yes прапануе так званую методыку дыялогавага ўзаемадзеяння — гэтая тэхніка нібыта ўнікальная, але насамрэч яна дужа нагадвае вельмі папулярны сёння камунікатыўны падыход у вывучэнні замежнай мовы.
Так ці інакш, месяц заняткаў у гэтай студыі абыдзецца вам у 104 рублі, і гэта не самыя высокія лічбы ў Гродне. Трошкі больш вы заплаціце, напрыклад, у школе Mr. English, дзе цэны на курсы стартуюць ад 120 рублёў у выпадку з пачатковым узроўнем англійскай. Аналагічныя цэны ў гродзенскай школе Happy English — ад 510 рублёў за 4 месяцы, што эквівалентна 127,5 рубля за месяц.
На поўначы Беларусі, у Віцебску, цэны на англійскую вышэйшыя. Напрыклад, камунікатыўны курс англійскай мовы ў віцебскай школе Light English будзе каштаваць вам 140 рублёў у месяц, базавы курс англійскай у школе Lingvobelka — 170 рублёў. Нарэшце, адзначым віцебскую школу «Элементарно!», якая ўвогуле пазначае цэны на сваім сайце ў далярах. Калі разглядаць тыя курсы школы, дзе заняткі адбываюцца двойчы на тыдзень, як гэта і прынята, цэны на іх стартуюць ад 81 даляра на месяц.
«Наша Нiва» — бастыён беларушчыны
ПАДТРЫМАЦЬ
Каментары