Міністр абароны Украіны сумняецца, што ядзерная зброя Пуціна ў спраўным стане
У інтэрв'ю агенцтву «Інтэрфакс-Украіна» міністр абароны Украіны Аляксей Рэзнікаў прызнаў, што рызыкі з боку «суседа з ядзерным патэнцыялам» заўсёды застаюцца, аднак да ягонага ўзбраення ёсць пытанні.
Як паведаміў Рэзнікаў, у 1997 годзе ў той ядзернай зброі, якую Кіеў перадаў Маскве, ужо заканчваўся тэрмін прыдатнасці. Гэтую інфармацыю перадаў яму другі прэзідэнт Украіны Леанід Кучма.
«Гэту зброю ўсё адно трэба было спісваць і ўтылізаваць. Мы яе ўсю аддалі ў Расію. Таму пытанне: а ў якім стане гэта старызна ў Расіі? Нашы ракеты «Сатана» ў Расіі яшчэ на ўзбраенні, мы іх рабілі больш за 40 гадоў таму. І ўзнікае пытанне: хто іх абслугоўвае, па якіх дакументах і колькі гадоў гэтым інжынерам…
Таму можна націснуць кнопку, але гэта можа бахнуць проста там», — лічыць Рэзнікаў.
У ЗША, аднак, сур'ёзна ставяцца да слоў Пуціна аб магчымым ужыванні ядзернай зброі, заявіў на брыфінгу ў сераду афіцыйны прадстаўнік амерыканскай Рады нацыянальнай бяспекі Джон Кірбі.
Каментары