Працяг падтрымкі Украіны ўхваляюць 74% грамадзян краін Еўрасаюза. Лідары шведы і фіны, найбольш скептычныя грэкі і балгары
Пра тое, што настроі на падтрымку Украіны ў яе вайне з Расіяй застаюцца ў аб'яднанай Еўропе высокімі, сведчаць звесткі апытання Eurobarometer, якое праводзілі па замове Еўрапарламента. Даследаванне было праведзена паміж 12 кастрычніка і 7 лістапада ва ўсіх 27 краінах — сяброўках ЕС. Апытанне ладзілі з вока на вока, усяго правялі 26 443 інтэрв'ю.
У 24 краінах — удзельніцах ЕС большасць грамадзян ухваляюць падтрымку Украіны, пры гэтым у пяці з іх паказчык падтрымкі перавышае 90%. Пры гэтым самы высокі ўзровень у Швецыі (97%), Фінляндыі (95%), Нідэрландах (93%), Партугаліі (92%) і Даніі (92%).
Узровень падтрымкі Украіны ў Літве — 87%, Польшчы — 85%, Латвіі — 80%, Эстоніі — 76%. У Венгрыі, улады якой заўсёды займаюць асаблівую пазіцыю па санкцыях супраць Расіі, грамадства падтрымлівае Украіну на 59%, і гэта не апошняе месца.
Толькі ў трох краінах узровень падтрымкі Украіны ніжэйшы за 50%: у Славакіі (49%), Грэцыі (48%) і Балгарыі (48%).
«За дзесяць месяцаў вайны ва Украіне падтрымка канкрэтных мер, прынятых ЕС, такіх як санкцыі супраць расійскага ўрада або фінансавая, ваенная ці гуманітарная падтрымка Украіне, працягвае заставацца на ўзроўні 73%», — гаворыцца ў заяве па выніках апытання.
Пры гэтым каля дзвюх трацін (65%) грамадзян ЕС лічаць, што з-за вайны і яе наступстваў іх жыццё зменіцца.
Трагедыя з 30‑гадовай доктаркай са Старобіна — пайшла выдаляць зуб мудрасці і памерла24
Каментары