Фізасобы ў Беларусі ў студзені прадалі наяўнай валюты больш, чым купілі
Фізасобы ў Беларусі ў студзені прадалі на $89,2 млн наяўнай замежнай валюты больш, чым купілі. Пра гэта сведчаць статыстычныя даныя Нацыянальнага банка.
Агульны аб’ём прададзенай фізічнымі асобамі наяўнай замежнай валюты ў студзені склаў $548,2 млн, набытай — $459 млн.
У сваю чаргу купля безнаяўнай замежнай валюты насельніцтвам у студзені перавысіла продаж больш чым на $149 млн. Агульны аб’ём набытай фізічнымі асобамі безнаяўнай замежнай валюты склаў $312,9 млн, прададзенай — $163,2 млн.
Такім чынам, у студзені агульны аб’ём набытай фізічнымі асобамі наяўнай і безнаяўнай замежнай валюты перавысіў яе прапанову на $60,4 млн.
Суб’екты гаспадарання — рэзідэнты Беларусі — у студзені таксама выступалі ў ролі чыстых пакупнікоў замежнай валюты. Зыходзячы са звестак Нацыянальнага банка прадпрыемствы купілі на $14,4 млн валюты ў эквіваленце больш, чым прадалі.
Агульны аб’ём набытай юрыдычнымі асобамі замежнай валюты ў студзені склаў $1,871 млрд, прададзенай — $1,857 млрд.
Каментары