Новыя падрабязнасці пра атаку на самалёт у Мачулішчах: прапагандысты назвалі новыя імёны
Сёння на тэлеканале «Беларусь 1» паказалі чарговыя сюжэты, прысвечаныя атацы на самалёт А-50 на вайсковым аэрадроме ў Мачулішчах. З іх стала вядома, хто яшчэ, апрача ўкраінца Мікалая Швяца, абвінавачваецца ў саўдзеле ў гэтай дыверсіі.
Прапагандысты паказалі нейкую Лілію Шарай, падпісаную як «затрыманая». Яна нібыта садзейнічала Швяцу ўсляпую.
Стрыечная сястра Шалай, Ала Яцута з Ровенскай вобласці Украіны, нібыта прыехала ў Мінск за дзень да атакі ў госці да сястры і папрасіла тую зняць кватэру, якая насамрэч прызначалася для Швяца. Таксама Яцута нібыта сустракалася са Швяцом у Століне.
У сюжэце гаворыцца, што Яцута з'ехала з Беларусі пасля таго, як правалілася эвакуацыя Швяца праз Столін. Таксама выехаў яшчэ адзін чалавек, датычны да аперацыі. Называецца толькі яго прозвішча — Дзёмін.
Таксама ў сюжэце пацвярджаецца, што Мікалай Швец быў затрыманы ў доме Настассі Пілько і Алега Сычова ў Бараўлянах. А яшчэ раней паказалі, як ён праходзіць памежны кантроль падчас спробы ўехаць у Беларусь у студзені.
Мікалай Швец спрабаваў прайсці польска-беларускую мяжу пад Гродна, як сведчыць сюжэт, 18 студзеня. Памежнік Андрэй Мірончык сцвярджае, што той прасіў яго не ставіць у пашпарт беларускі штамп, хоць меў такі з польскага боку. Гэтым ён выклікаў падазрэнне і быў дадаткова агледжаны. Але паколькі нічога забароненага пры ўкраінцу не знайшлі, то яго не затрымлівалі, хоць і ў Беларусь не пусцілі. А дабіраўся ён пасля ўжо нібыта абходнымі шляхамі, праз Латвію і Расію.
Чытайце таксама:
Сталі вядомыя падрабязнасці затрымання меркаванага «ўкраінскага тэрарыста»
КДБ пацвердзіў, што да дыверсіі ў Мачулішчах меў дачыненне «Байпол»
Каментары