Адказнасць за выбух у Санкт-Пецярбургу ўзяла на сябе «Нацыянальная рэспубліканская армія»
Адказнасць за выбух у Пецярбургу, у выніку якога загінуў «ваенкар» Уладлен Татарскі, узяла на сябе «Нацыянальная рэспубліканская армія». Заяву «піцерскай калоны» арганізацыі апублікаваў тэлеграм-канал «Распартызан», а таксама яго распаўсюдзіў былы дэпутат Дзярждумы Ілля Панамароў, які жыве ва Украіне.
«Мы арганізавалі і зрабілі акцыю 2 красавіка 2023 года супраць групы Z-актывістаў і асабіста супраць вядомага падпальшчыка і прапагандыста вайны, ваеннага злачынца Максіма Фаміна, вядомага як Уладлен Татарскі. Гэтая акцыя падрыхтаваная і здзейсненая намі аўтаномна, і мы не маем сувязі і не атрымлівалі дапамогі ні ад якіх замежных структур і тым больш спецслужбаў», — заявілі ў арганізацыі.
Акрамя таго, там падкрэслілі, што акцыя не была накіраваная супраць мірных грамадзян, а «ўсе пацярпелыя ўваходзяць у лік актыўных прыхільнікаў вайны».
Прадстаўнікі арганізацыі таксама заклікалі расійскіх праваабаронцаў аказаць дапамогу Дар'і Трэпавай, арыштаванай па гэтай справе, і «іншым нявінным людзям».
Раней гэтая самая арганізацыя ўзяла на сябе адказнасць за забойства Дар'і Дугінай у жніўні 2022 года.
Каментары