Зорку сусветнага біятлона ўкусіла гадзюка. Ëн дасціпна пажартаваў з гэтага
Пачатак сезона прайшоў не так добра для Ёханеса Тынеса Бё, які за апошні месяц стаў ахвярай некалькіх няшчасных выпадкаў ва ўласным доме.
Днямі Ёханес працаваў у садзе ў сваім доме ў Конгсвінгеры. Але калі ён зайшоў у дом, то зразумеў, што нешта не так, піша NRK.
«Калі я ўвайшоў, то ўбачыў, што з нагі цячэ трохі крыві, потым я ўбачыў два ўкусы», — расказаў біятланіст.
Высветлілася, што гэта ўкусы гадзюкі. Бё была аказана хуткая медыцынская дапамога.
«Цяпер я адчуваю сябе ў бяспецы. Будзем спадзявацца, што гадзюка надзяліла мяне тымі ж магічнымі звышздольнасцямі, што і Чалавека-павука павук, які ўкусіў яго», — жартуе нарвежац.
Таксама Бё нядаўна зваліўся з батута і пашкодзіў спіну.
Ёханес — пяціразовы алімпійскі чэмпіён, 17-разовы чэмпіён свету, трохразовы ўладальнік Кубка свету ў агульным заліку, шматразовы пераможца этапаў Кубка свету.
У мінулым сезоне ён выйграў 25 гонак на этапах Кубка свету, у тым ліку чэмпіянат свету ў Оберхофе. На ЧС ён заваяваў медалі ў кожнай гонцы.
У Ёханеса ёсць старэйшы брат Тар'ей, такі ж славуты біятланіст.
Каментары