Учора стала вядома пра затрыманне пастара царквы «Новае жыццё» і ягонага зяця Ільі Будая. Сёння над абодвума мужчынамі прайшоў суд.
Як піша «Хрысціянская візія», Ганчарэнку прысудзілі 10 сутак за нібыта непадпарадкаванне, а Будаю — 5 сутак за дробнае хуліганства: нібыта ён лаяўся і размахваў рукамі.
Царква «Новае жыццё» — гэта рэлігійная грамада хрысціян поўнага Евангелля, кіраўніцтва якой і вернікі здаўна падвяргаюцца пераследу з боку ўлад. У асноўным змаганне ішло за будынак царквы на вуліцы Кавалёва, 72 у Мінску, які быў пераабсталяваны вернікамі з былога кароўніка. У лютым 2021 года царкву выселілі з будынка, а нядаўна яго пачалі разбіраць. Малітоўныя сходы праводзілі побач на паркоўцы.
Сам жа пастар Вячаслаў Ганчарэнка пасля выбараў 2020 года асудзіў гвалт сілавікоў на беларускіх вуліцах і заклікаў улады пакаяцца. У верасні 2022 года яго ўжо затрымлівалі і штрафавалі на 100 базавых велічынь.
Днямі царква атрымала паведамленне, што яе інфармацыйную прадукцыю збіраюцца прызнаць «экстрэмісцкімі матэрыяламі».
Каментары