Былы журналіст Сяргей Гардзіевіч на волі, але ў яго забралі сродкі сувязі
Былы палітзняволены журналіст з Драгічына выйшаў на волю пасля 15 сутак адміністрацыйнага арышту.
Як паведамлялася раней, Гардзіевіча затрымалі на памежным пераходзе «Брэст» 14 верасня, калі ён вяртаўся з Польшчы ў Беларусь, нагадвае БАЖ.
Былы карэспандэнт інфармацыйнага сайта «Першы рэгіён» стала жыве ў Беларусі і выязджаў у Польшчу па асабістых справах.
Падчас вяртання на радзіму ў Сяргея Гардзіевіча на мяжы сілавікі запатрабавалі для праверкі тэлефон. У выніку на яго склалі адміністрацыйны пратакол за распаўсюд экстрэмісцкіх матэрыялаў. Нагодай таму сталі рэпосты публікацый ў сацыяльных сетках, зробленыя яшчэ ў 2020 годзе.
Ноч пасля затрымання Гардзіевіч правёў у ізалятары часовага ўтрымання, пасля чаго яго перавезлі ў Драгічын. Адміністрацыйная справа разглядалася 15 верасня ў судзе Драгічынскага раёна. Яго прызналі вінаватым у здзяйсненні правапарушэння паводле арт. 19.11 КаАП і пакаралі арыштам на 15 сутак.
Адбыўшы гэты тэрмін, Сяргей Гардзіевіч выйшаў на волю, але без сродкаў сувязі. Тэлефон і іншую тэхніку ў яго забралі падчас затрымання.
Напрыканцы кастрычніка 2022 года экс-журналіст вызваліўся з папраўчай калоніі № 17 у Шклове, дзе правёў 1,5 года зняволення па крымінальнай справе.
2 жніўня 2021 года суддзя Іванаўскага раёна Генадзь Кудласевіч прызнаў Сяргея Гардзіевіча вінаватым паводле трох крымінальных артыкулаў:
- Абраза прадстаўнікоў улады ў сувязі з выкананнем імі службовых абавязкаў (арт. 369 КК),
- Распаўсюд загадзя ілжывых і зневажальных іншых асоб звестак (паклёп), якія змяшчаюць абвінавачаванне ў здзяйсненні цяжкага злачынства (арт. 188 КК),
- Публічная абраза Лукашэнкі.
Масавыя арышты афіцэраў прайшлі на авіябазе ў Мачулішчах — абвінавачваюць у сувязях з апазіцыяй43
Каментары