«Цяпер ёсць Камароўка, чырвоны дворык, любімая кнігарня і батанічны сад». Беларуска стварае духмяныя свечкі з пахам месцаў Мінска

Кацярыне 30 гадоў, па адукацыі яна тэхнолаг, за гады пераспрабавала шмат прафесій: ад майстра манікюру да рэкрутара ў айці-кампаніі.

Два гады таму яна з сям'ёй вырашала перабрацца з Мінска ў Вільню. Падчас адаптацыі ў новым горадзе дзяўчына задумалася пра тое, што хацела б заняцца новым хобі. Выбрала свечкі. Кацярына — стваральніца свечак з пахам Мінска.

«Я заўсёды любіла араматычныя свечкі, часта іх купляла дадому для стварэння выгоды і атмасферы. Праўда, адныя араматызавалі прастору добра, а іншыя — не. Тады я вырашыла даведацца, чаму так адбываецца? — дзеліцца рамесніца. — Прайшла навучанне па свечкаварэнні, закупіла тоны матэрыялаў і пачала бясконцае тэставанне.

Было вельмі цікава і мяне не адпускала. Спачатку я варыла свечкі для сябе і сяброў. Атрымлівала шмат водгукаў, і па выніку наважылася на стварэнне свайго брэнда.

Назва прыйшла досыць хутка. У чарговай размове з сястрой я дзялілася сваімі ідэямі і думкамі аб праекце. Часта думаю пра дом, як сумую па ім. Так і нарадзіліся DUMKi. Далей усё склалася, нібы пазл. Зразумела, што трэба адштурхоўвацца ад месцаў любімага горада і захаваць іх на этыкетках».

Пра водары свечак: «Усе яны звязаныя з любімымі месцамі»

Першая калекцыя брэнда DUMKi складаецца з 4-х араматычных свечак і называецца Міnѕк edition. Для візуалізацыі сваёй калекцыі я знайшла лепшую дызайнерку. Яна вельмі дапамагала мне ў рэалізацыі ідэі: малявала налепкі і паштоўкі менавіта так, як я апісвала, дапамагла стварыць экалагічную ўпакоўку. На выхадзе свечкі атрымаліся менавіта такімі, якія я задумала.

Сярод водараў ёсць «Камароўка». Гэтая свечка з пахам свежых садавіны і зеляніны. Яна была абавязковая, бо амаль ва ўсіх маіх знаёмых на гэтым рынку ёсць любімае месца, дзе купляюць самыя смачныя кавуны.

Павялічыць

Водар «Чырвоны дворык» адсылае да вечара пятніцы, калі можна сабрацца з сябрамі. Прысутнічаюць ноты ягад і шампанскага.

Павялічыць

Наступная свечка — пад назвай «Батанічны сад». Мы часта гулялі там з сям'ёй. Для мяне гэтае месца — пра цяпло, вясну і абавязкова кветкі. У маім тэлефоне да гэтага часу незлічоная колькасць фатаграфій адтуль.

Павялічыць

У лінейцы ёсць свечка, натхнёная вельмі атмасфернай букіністычнай крамай «Вянок» у Траецкім прадмесці. Там зачароўвае пах старых кніг і скураных нататнікаў.

Павялічыць

Аб працэсе стварэння свечак: «Самае цяжкае — чакаць»

Свечкі майго брэнда ствараюцца з натуральнага соевага воску. Аромаалеі не ўтрымліваюць фталатаў і маюць міжнародныя сертыфікаты IFRA (Міжнародная асацыяцыя па араматычных рэчывах). У сярэдзіне — драўляны крыжападобны кнот. Ён прыемна патрэсквае і вурчыць, ствараючы тым самым яшчэ больш выгодаў.

Свечкі робяцца досыць хутка, але кожнай неабходна настаяцца як мінімум 14 дзён, каб усё, што яе складае, «пасябравала». Толькі так яна будзе добра араматызаваць прастору.

З гэтага вынікае першая складанасць у свечкаварэнні для мяне: наяўнасць цярпення. У самым пачатку свайго шляху я запальвала свечку літаральна на наступны дзень пасля яе вырабу. Цікава было даведацца, ці добра ўсё атрымліваецца ў мяне. Так лепш не рабіць: водарааддача вельмі залежыць ад гэтага этапу. Таму цяпер я чакаю і штодня раблю праверачныя «занюхі».

Павялічыць

Другая складанасць — выбар араматычных алеяў. Часцей за ўсё апісанне водараў для свечак выглядае прыкладна так: «Пах расы а 5-й раніцы ў эльфійскім лесе з ноткамі мандарына». Спачатку я скупляла іх усе і выбірала патрэбныя ўжо па факце.

Так, напрыклад, нарадзілася свечка «Камароўка», яна ж Seasonal market. У апісанні да яе водару было напісана нешта пра свежасарваны рэвень у бабулі ў агародзе. На гэта сыходзіла шмат тыдняў чакання, таму што алеі прыязджалі з розных куткоў Еўропы.

Пра будучыя калекцыі: «У планах — лінейка свечак з калядным Мінскам»

Я актыўна развіваю свой брэнд, удзельнічаю ў кірмашах. Мае свечкі ўжо прадстаўленыя ў адным з шоурумаў Вільні, я закаханая ў сваю справу і буду працягваць ёй займацца.

Нядаўна выйшлі восеньскія навінкі водараў па матывах Вільні і Балтыйскага мора, таксама вельмі папулярныя ў гэтым сезоне. У найбліжэйшы час я прадстаўлю калядную калекцыю, з новымі, але такімі знаёмымі месцамі любімага Мінска.

Колькі каштуюць свечкі і дзе іх можна купіць?

Кошт адной свечкі 20 еўра. Яе аб'ём 190 мл, гарыць яна каля 25 гадзін. Забраць можна самому з майго шоуруму ў Вільні (Šeimyniškių g. 14). Ці замовіць дастаўку поштай па Еўропе.

З дастаўкай у Беларусь складаней: я звычайна перадавала свечкі праз сяброў альбо з кімсьці. Пакуль практыкавала толькі такі спосаб, але можна дамовіцца праз дырэкт інстаграма.

• 1
• 0
• 0
• 0
• 1
• 2
• 1
• 0