Фільм «Вышэй за неба» застаецца адной з найлепшых мастацкіх стужак, знятых за часамі незалежнасці. Зняты па праграме барацьбы з ВІЧ, ён выходзіць за гэтыя вузкія рамкі, без прыкрас адлюстроўваючы беларускую рэчаіснасць пачатку 2010-х гадоў. Паглядзелі, чым праз дзесяцігоддзі займаюцца акцёры.
Сюжэт фільма разгортваецца вакол 20-гадовага студэнта і музыкі Мікіты Міцкевіча, які пачынае стасункі з дачкой дэкана Янай. Але ўсё жыццё хлопца разбурае стыгматызаваны дыягназ ВІЧ і рознагалоссі на творчай арэне. Мікіта скочваецца ў яму, з якой яго літаральна выкідаюць пад ногі аднагрупніцы Волі. Хлопец спрабуе скарыстацца гэтым шанцам, але на шляху яшчэ нямала перашкод.
Леанід Пашкоўскі
Галоўную ролю ў фільме выканаў Леанід Пашкоўскі. Для 25-гадовага хлопца, які толькі скончыў эканамічны ўніверсітэт, гэтая роля ў кінематографе стала адзінай, але з экранаў ён не знік. Пашкоўскі нарадзіўся ў 1987 годзе ў Жлобіне, што адносіўся да тэрыторый, якія пацярпелі ад Чарнобыльскай катастрофы, і праз гэта яго часта па праграмах дапамогі адпраўлялі на аздараўленне ў Італію, Іспанію і Германію. Відаць, гэтыя паездкі паўплывалі на яго любоў да вандровак.
У 2017 годзе Леанід Пашкоўскі завёў ютуб-канал «Хачу дадому», у якім распавядае пра свае падарожны ў самыя небяспечныя мясціны Азіі, Афрыкі і Паўднёвай Амерыкі. У хуткім часе, у канцы 2018 года, Леаніда прызналі найлепшым трэвэл-блогерам паводле версіі чытачоў часопіса National Geographic Traveler. Сёння на ягоны канал падпісаны 1,33 млн гледачоў, а ролікі пра мясцовыя традыцыі розных рэгіёнаў, тамтэйшае гарадское жыццё, трушчобы, крымінал і ежу набіраюць сотні тысяч, а часам нават мільёны праглядаў.
Леанід Пашкоўскі не забывае пра радзіму. У 2020 годзе ён падтрымаў памкненне беларусаў дасягнуць мірных перамен.
«Мы, у адрозненне ад прэзідэнта, усе гэтыя гады развіваліся, раслі, разумнелі і гатовыя стаць грамадзянамі прагрэсіўнага і справядлівага грамадства, а не маленькай, беднай афрыканскай дыктатуры пасярод Еўропы», — выказваўся ў інстаграме блогер.
У 2022 годзе ён таксама асудзіў расійскую агрэсію, прысвяціўшы выжыванню ўкраінцаў ва ўмовах вайны некалькі сваіх відэа.
Алеся Грыбок
Алеся Грыбок, якая сыграла ў фільме першую каханку Мікіты Яну, пайшла па акцёрскім шляху, як і многія, іграючы эпізадычныя ролі ў расійскіх серыялах. Адно з нешматлікіх выключэнняў — беларускі канспіралагічна-прапагандысцкі фільм «Код Каіна», зняты па дзяржаўным заказе.
Сёння Грыбок кастынг-дырэктарка. Яшчэ ў 2015 годзе ў яе выйшла кніга «Менеджмент кінаакцёра», якая ў 2022 годзе зведала трэцяе выданне. У 2021 годзе Грыбок стала аўтаркай вучэбнай праграмы па спецыяльнасці «талент-менеджар акцёра» для расійскай Вышэйшай школы эканомікі.
Апошнім часам беларуская актрыса выйшла ў сацсеткі. Хутчэй за ўсё, калі вы карыстаецеся тыктокам, то ўжо траплялі на ейныя ролікі. У вельмі якасна знятых відэа акторка распавядае пра тое, як праходзіць кастынгі і якія тыпажы цікавяць людзей, што адказваюць за падборы акцёраў. Кожны ролік Грыбок залятае на сотні тысяч праглядаў. Таксама актрыса мае 707 тысяч падпісчыкаў на ютубе і 204 тысячы падпісчыкаў у інстаграме.
Аксана Чывялёва
Кіношная суперніца Яны — Воля, другая дзяўчына Мікіты (у жыцці Аксана Чывялёва) — таксама працягнула акцёрскую кар’еру ў расійскіх серыялах. Але беларусам яна вядомая па іншай дзейнасці. Аксана агучвала дыснееўскія і іншыя фільмы для VOKA. Яе голас можна пачуць у беларускай агучцы «Папялушкі», «Рататуя», «Карпарацыі монстраў», «Галаваломкі» і «Ведзьмінай дастаўкі» Хаяа Міядзакі.
Аляксей Яравенка
Творчы супернік Мікіты — Стас, які прамяняў іхні беларускі гурт на папсу і поспех у Расіі, у жыцці выбраў зусім іншы шлях. Аляксей Яравенка, які сыграў Стаса, шмат гадоў здымаецца ў серыялах і выступае з уласным блюз-бэндам ва Украіне, дзе ў 2014 годзе ажаніўся з украінкай Вольгай Карпавай. У час расійскага ўварвання ў інстаграме запісаў відэзвароты да беларусаў і расейцаў, збіраў грошы на рыштунак для ўкраінскіх ваяроў. Сёння Аляксей набірае на свой курс «акцёрскага майстэрства».
Vinsent
Сярод усіх эпізадычных роляў, а ў фільме адзначылася даволі шмат беларускіх дзеячаў, найбольш значнымі з’яўляюцца дзве. Па-першае гэта Зміцер Папко, ён жа рэпер Vinsent, які ў фільме грае амаль самога сябе — аднаго з музыкаў у гурце. Роля нешматслоўная, але задае беларускі вектар развіццю сюжэта. У 2010-я гады беларускамоўны рэпер здымаўся ў кіно і выпускаў альбомы, але апошнія гады знік са сцэны. Ён жыве і працуе ў Варшаве. Займаецца аўдыяпрадакшанам: піша біты на Захад, агучвае кінастужкі, піша джынглы для тэле- і радыёперадач.
Пры канцы 2023 года спявак вярнуўся да музыкі і выпусціў кранальную песню «Не заўжды» пра вяртанне дадому. У кліпе зняліся зорныя купалаўцы Зоя Белахвосцік, Алег Гарбуз, Валянціна Гарцуева.
Яўген Булка
Другая — роля Яўгена Булкі, які таксама ў фільме звязаны з гуртам Мікіты. У 2020 годзе вядучы Яўген Булка падтрымаў пратэсны рух, з-за чаго страціў працу і знік з беларускай медыясферы. У маі 2023 года ён з жонкай і дзецьмі з'ехаў у Ізраіль, дзе актыўна вывучаў іўрыт. Але ў хуткім часе давялося бегчы і адтуль. 7 кастрычніка пачаўся напад ХАМАС на паўднёвыя раёны Ізраіля. Яўген з жонкай Маяй і сынам Лявонам выехалі ў Грузію, а пасля ў ААЭ.
Іншыя персанажы
Віктар Рыбчынскі, які сыграў бацьку Мікіты, намесніка начальніка РУУС, нядаўна адзначыўся роллю ў прапагандысцкім беларускім фільме «На іншым беразе». Таццяна Баўкалава, якая сыграла маці Мікіты, працягнула працу ў Рускім тэатры імя Горкага, перыядычна здымаючыся ў расійскіх серыялах. Іншыя другарадныя персанажы таксама нічым асаблівым не адзначыліся.
Хіба што Тамара Міронава і Вольга Няфёдава, якія выканалі эпізадычныя ролі ў фільме, адзначыліся ў 2020 годзе тым, што дэманстратыўна не падтрымалі большасці сваіх калег па Купалаўскім тэатры, якія сышлі ў жніўні з тэатра на знак пратэсту супраць фальсіфікацыі прэзідэнцкіх выбараў, жорсткага разгону пратэстоўцаў і катаванняў затрыманых. Цяпер абедзве верхаводзяць у разгромленым тэатры і гастралююць па алкакрамах.
«Наша Нiва» — бастыён беларушчыны
ПАДТРЫМАЦЬБрат удавы Зельцара: Кадэбісты ішлі ў кватэру па мяне1
Каментары