Учынак Сяргея Каваленкі аб’яднаў віцебскую апазіцыю
11 студзеня ў горадзе быў створаны аргкамітэт у абарону грамадскага актывіста.
Учынак актывіста Кансерватыўна‑хрысціянскай партыі БНФ Сяргея Каваленкі — вывешванне над галоўнай навагодняй ялінай Віцебска бел‑чырвона‑белага сцяга — здолеў прыцягнуць вялікую ўвагу жыхароў краіны і замежжа. А яшчэ ён зрабіў немагчымае: аб’яднаў мясцовую апазіцыю.
У панядзелак у Віцебску адбыўся сход па стварэнні грамадскага камітэта ў абарону арыштаванага. Нагадаем, што ён змешчаны на два месяцы ў СІЗА. У адносінах да яго заведзена крымінальная справа па ч.2 арт. 339 УК Беларусі (хуліганства).
У аргкамітэт увайшлі прадстаўнікі розных дэмакратычных партый, рухаў, грамадскіх арганізацый, у прыватнасці, сустаршыня аргкамітэта па стварэнні партыі «Беларуская хрысціянская дэмакратыя» Павел Севярынец, маці палітыка Таццяна Севярынец, старшыня Віцебскай абласной арганізацыі партыі БНФ Кастусь Смолікаў, легендарны распаўсюднік незалежных выданняў Барыс Хамайда і інш.
На думку сяброў аргкамітэта, Сяргей Каваленка з’яўляецца палітвязнем, таму ўсе акцыі ў ягоную абарону будуць праходзіць пад лозунгам «Свабоду палітвязню Каваленку!».
Аргкамітэт правёў збор грашовых сродкаў у падтрымку арыштаванага і яго сям’і, а таксама абмеркаваў магчымыя дзеянні. Сярод запланаваных акцый — віншаванне С. Каваленкі з днём нараджэння, 16 студзеня яму споўніцца 35 гадоў. Мяркуецца, што будуць выдадзены ўлёткі з інфармацыяй пра ўчынак С. Каваленкі, якія будуць распаўсюджвацца сярод жыхароў горада.
Магчыма, будуць зроблены майкі, значкі ці паштоўкі з выявай навагодняй ёлкай і сцягам над ёй і надпісам «Віцебск. 7 студзеня 2010 года». Аргкамітэт таксама шукае адваката для арыштаванага і збіраецца прадаставіць інфармацыю па «справе аб яліне» амбасадам краін Еўрасаюза і розным праваабарончым арганізацыям.
Цяпер чытаюць
Пяць прычын — у тым ліку адна фантастычная, — па якіх беларусам адключылі святло ў гарадах9
Пяць прычын — у тым ліку адна фантастычная, — па якіх беларусам адключылі святло ў гарадах
Агентка Кардаш выкарыстоўвала сэкс, каб збіраць інфармацыю пра каліноўцаў і завербаваць украінскага камандзіра. А куратару КДБ пісала пра яго: «Мой лох»3535
Каментары