Адзін з беларускіх перавозчыкаў вяртае раней адмененыя рэйсы ў Літву
Кампанія «Сентыера», якая раней рабіла пасажырскія перавозкі з Віцебска ў Літву, з 1 красавіка мае намер аднавіць рэйсы ў Вільню. Пра гэта фірма паведаміла ў сацсетках, а таксама разаслала SMS-паведамленні кліентам, піша «Люстэрка».
«Першы рэйс 1 красавіка адправіцца ў 20.00 з Віцебска, а далей будзем карэктаваць расклад, таму што не ведаем, што будзе на межах, — паведамілі ў кантакт-цэнтры кампаніі. — Назад з Вільні першы рэйс будзе ў 15.00 (2 красавіка. — Заўв. рэд.), а далей будзем глядзець. Нам трэба зразумець, што на межах, як нас прапусцяць».
Кошт праезду — 160 рублёў у адзін бок.
Пра іншыя маршруты (раней былі рэйсы таксама ў Коўна і Шаўлі) пакуль што гаворкі не вядзецца.
Кампанія «Сентыера» адмяніла рэйсы ў Літву ў канцы лютага.
«У сувязі з тым, што Літва забараніла перавозку пасажыраў у нерэгулярных зносінах, з 29 лютага мы вымушаныя прыпыніць усе рэйсы ў/з Літвы, — паведамляў тады ў сваіх сацсетках перавозчык. — Вельмі спадзяемся, што ў хуткім часе сітуацыя вырашыцца на нашу карысць і рэйсы будуць адноўленыя. Дыспетчарская працаваць не будзе».
Акрамя нядаўняга закрыцця двух памежных пераходаў, Літва таксама з 1 сакавіка забараніла нерэгулярную аўтобусную перавозку без дазволу.
Чытайце таксама:
Гродзенскі перавозчык прыдумаў геніяльны ход, як хутка перасекчы мяжу аўтобусу. І зэканоміў суткі
Адмянілі яшчэ адзін аўтобусны маршрут, які хадзіў з Беларусі ў Літву
Буйны перавозчык расказаў, што з аўтобусамі ў ЕС пасля закрыцця «Катлоўкі» і «Прывалкі»
З Гродна ў Беласток — за 43 гадзіны. Беларускі аўтобус паставіў рэкорд па часе на мяжы
Каментары