У Расіі на жанчыну напісалі данос за фота ў жоўтай куртцы на фоне сіняга неба
Яна пажадала даносчыку знайсці грамадска карыснае хобі.
Жыхарку расійскай Валагодскай вобласці Антаніну Смоліну 3 красавіка наведаў паліцэйскі. Ён паведаміў, што на жанчыну напісалі данос: невядомаму не спадабалася яе фатаграфія ў жоўтым пухавіку на фоне сіняга неба.
У даносе пазначаецца, што такое спалучэнне колераў выклікае асацыяцыю з «варожымі сімваламі», гэта значыць са сцягам Украіны, паведамляе Baza.
Антаніна напісала тлумачальную. У паперы жанчына адзначыла, што на колер неба яна паўплываць ніяк не можа, а грошай, каб мяняць верхнюю вопратку ў залежнасці ад грамадскай ацэнкі таго ці іншага колеру, у яе няма. Смоліна расказала, што паліцэйскі паставіўся да яе справы з разуменьнем.
Пазней жанчына адшукала даносчыка ў сацсетках — ім аказаўся нейкі Валерый Мікалаевіч. Жанчына пажадала мужчыну «поспехаў, здароўя, дабрабыту і знайсці грамадска карыснае хобі, не звязанае з доўгім выкарыстаннем гаджэтаў, таму што гэта негатыўна адбіваецца на здароўі чалавека».
Каментары