Лукашэнкаўскія прапагандысты развялі аднаго з кандыдатаў у прэзідэнты Літвы
Інтэрв'ю аднаго з кандыдатаў у прэзідэнты Літвы Гедрымаса Яглінскаса нечакана з'явілася на беларускім дзяржаўным тэлеканале «Беларусь 1». Ён сцвярджае, што трапіў у расстаўленую пастку, паколькі па добрай волі гэтаму рэсурсу яго б ні за што не даў, піша Delfi.lt.
«Да мяне па інтэрв'ю афіцыйна звярнуўся апазіцыйны расійскі партал Meduza, пасля гэтага нечакана інтэрв'ю змясцілі на беларускім прапагандысцкім канале з разнастайнымі ватніцкімі ўпрыгожваннямі. Што магу сказаць, гэта ацэнка. Падобна, прапагандыстам неспакойна з-за моцнай і бяспечнай краіны, за якую мы павінны змагацца як ніколі.
Што тычыцца зместу інтэрв'ю — тут я спакойны, але трапіць на такі канал было шчыра непрыемна. З майго боку, парада ўсім калегам — вельмі адказна ацаніце, ці варта каментаваць нешта нават «апазіцыйным» каналам», — напісаў у сераду ўвечары Яглінскас.
Рэдакцыя Delfi звязалася з галоўным рэдактарам «Медузы» Іванам Калпаковым, які пацвердзіў, што «Медуза» ніякага дачынення да атрыманага Яглінскасам ліста не мае. Усе лісты журналістаў выдання рассылаюцца з сервера «Медузы», а сітуацыя з лістом і інтэрв'ю выглядае як пранк.
Акрамя таго, на думку Калпакова, ліст напісаны відавочна не журналістам.
Яглінскас — адзін з 8 кандыдатаў на пасаду прэзідэнта Літвы. Ягоную кандыдатуру вылучыў Дэмакратычны саюз «У імя Літвы».
Каментары