Невядомыя знішчылі крыжы і стэнды ў «віцебскіх Курапатах» недалёка ад вёскі Хайсы ў Віцебскім раёне. Пра гэта распавёў стваральнік ініцыятывы «Хайсы — віцебскія Курапаты» Ян Дзяржаўцаў са спасылкай на сяброў ініцыятыўнай групы, заўважыў reformby.org.
Паводле слоў Дзяржаўцава, знішчаны ўсе 8 металічных паказальнікаў, якія вялі да магіл ахвяр камуністычнага тэрору, «рэшткі якіх былі раскапаны пошукавікамі 52-га пошукавага батальёна, а затым чыноўнікі загадалі пахаваць 172 чалавекі ў брацкай магіле каля станцыі Лосвіда пад выглядам» ахвяраў нацыстаў.
Акрамя таго, знішчаны 26 крыжоў разам з таблічкамі, якія расказвалі пра расстрэлы ў часе сталінскага тэрору.
Дзяржаўцаў адзначае, што металічныя рамкі ад стэндаў і таблічак пры гэтым засталіся цэлымі, а самі стэнды з пластыка разбіты і зніклі.
Дзяржаўцаў таксама расказаў, што ў той дзень пасля агляду месцаў расстрэлаў сябры прыйшлі да мемарыяла з трыма крыжамі і заняліся праполкай пустазелля.
Тым часам да аднаго з іх падышлі мужчына і жанчына і спыталі, што што ён тут робіць і хто яго сюды паслаў. Мужчына сфатаграфаваў яго на тэлефон, пасля чаго са спадарожніцай пайшлі ў бок вёскі.
Прыкладна праз паўгадзіны валанцёры пачулі гук машыны, якая пад'ехала і спынілася каля мемарыяла, і з гучнагаварыцеляў людзі пачалі крычаць, каб тыя выходзілі з лесу. Гучалі пагрозы, што ў адваротным выпадку яны пойдуць шукаць іх і, калі знойдуць, то «мала не здасца».
«Сябры схаваліся ў лесе, і вядома з лесу не выйшлі, але адзін сябра сфатаграфаваў машыну здалёк, на фота не вельмі бачна марку, але гэта не важна, галоўнае, што, мабыць, па сігнале гэтых мужчыны і жанчыны сілавікі прыехалі затрымаць і пакараць сяброў ініцыятывы «Хайсы», — мяркуе ён.
Хайсы называюць «Віцебскімі Курапатамі». У 2015 годзе на гэтым месцы знайшлі парэшткі людзей, расстраляных у гэтай мясцовасці ў 1937-1938 гадах. Актывісты стварылі тут мемарыял памяці, устанавілі некалькі крыжоў і інфармацыйны стэнд.
Цяпер чытаюць
81‑гадовую маці аўтарытэта Скітова з «Бабулінай крынкі» кінулі ў СІЗА КДБ, каб ён нарэшце загаварыў6
Каментары