«Штадлер» не мае намеру прадаваць завод у Фаніпалі. Хоць беларускія чыноўнікі сцвярджалі іншае
Швейцарскія СМІ апублікавалі інтэрв'ю былога члена Нацыянальнай рады краіны, галоўнага выканаўчага дырэктара Stadler Rail AG Петэра Шпулера, які пракаментаваў планы беларускіх уладаў па змене ўласніка прадпрыемства ў прыгарадзе Мінска. Бізнэсовец адмаўляе магчымую змену ўласніка беларускага завода, піша Tochka.by.
Нядаўна былы міністр транспарту і камунікацый, а цяпер намеснік кіраўніка ўрада Анатоль Сівак заявіў пра тое, што завод стаў беларускім.
«Упэўнены, што мы будзем і далей ездзіць на рухомым складзе, які будзе вырабляць гэта беларускае прадпрыемства», — сказаў чыноўнік, каментуючы перспектывы запуску спыненага прадпрыемства.
Пасля міністр транспарту і камунікацый Аляксей Ляхновіч запэўніў у тым, што завод у Фаніпалі стане не швейцарскім, а беларуска-расійскім.
«Цяпер мы разам з чыгункай прапрацоўваем пытанне па тым, каб пачаць на адным з прадпрыемстваў рэспублікі буйнавузлавую зборку маторвагоннага рухомага складу альбо стварыць нейкае сумеснае таварыства для таго, каб аднавіць вытворчасць на «Штадлеры», — заявіў міністр транспарту.
Развіваючы тэму, расійскія, а ўслед за імі і беларускія СМІ расказалі пра тое, што гаворка можа ісці пра «Траснмашхолдынг» (належыць на 4/5 кампаніям Іскандэра Махмудава, Андрэя Бокарава, Дзмітрыя Камісарава і Кірыла Ліпа, 20% капіталу ў французскай Alstom) і «групе Сінара» (асноўны ўладальнік Дзмітрый Пумпянскі, які афіцыйна выйшаў з кіраўніцтва ў сакавіку 2022-га), якія знаходзяцца пад санкцыямі Украіны і ЗША, але не Еўрасаюза і Швейцарыі.
Каментуючы навіны, якія паступаюць з Беларусі і Расіі, кіраўнік Stadler Rail AG адзначыў, што кампанія «заўсёды выконвала санкцыі на 100%», а таксама даволі нечакана заявіў, што няма абсалютна ніякіх прыкмет таго, што «ў Беларусі ёсць нейкія планы ў змене структуры ўласнасці нашага мінскага завода».
Прадстаўнік Stadler Марк Мешэнмозер дадаў, што продаж завода ў нашай краіне не плануецца, а кампанія не ўдзельнічала ні ў якіх дыскусіях паміж прадстаўнікамі беларускага ўрада і расійскімі кампаніямі. Акрамя таго, Мешэнмозер у чарговы раз паведаміў, што пасля ўвядзення ў 2021 годзе санкцый супраць беларускіх уладаў Stadler рэлакаваў большую частку вытворчасці і персаналу з Беларусі ў ЕС.
Паводле яго слоў, на заводзе ў Фаніпалі, які афіцыйна не спыніўся, з 2000 рабочых цяпер працуе каля 200 чалавек, якія займаюцца механазборачнымі работамі.
Што да міжнароднай карпарацыі Stadler Rail, то яна актыўна расце і пашырае рынкі збыту. Да прыкладу, у лютым стала вядома, што вытворца чыгуначных і метровагонаў ды лакаматываў заключыў буйную здзелку ў Саудаўскай Аравіі. Кошт замовы складае каля 600 млн швейцарскіх франкаў.
Тыдзень таму Stadler паказала на міжнароднай выставе InnoTrans-2024 грузавы гібрыдны лакаматыў для Вялікабрытаніі і метрапоезд для Берліна. А літаральна ўчора міністр транспарту Узбекістана Ілхом Махкамаў паведаміў, што Узбекістан разглядае набыццё цягнікоў Stadler, і праект выйшаў на фінішную прамую: будзе праведзена вопытная эксплуатацыя двух электрацягнікоў.
У рамках пагаднення швейцарцы разглядаюць варыянт з лакалізацыяй вытворчасці ў гэтай краіне.
«На роздум далі паўгадзіны». Настаўніцы з Полацка давялося звольніцца з-за тыкток-блога2
Каментары