$700 мільёнаў на звалцы — цяпер канчаткова. Брытанец не зможа выкапаць са смецця свой дыск з біткойнамі
Брытанскі суд адмовіўся разглядаць пазоў жыхара Уэльса, які патрабаваў ад мясцовых улад дазволу правесці раскопкі на гарадской звалцы, каб знайсці цвёрды дыск з біткойнамі, выкінуты яшчэ ў 2013 годзе, піша Бі-бі-сі.
Джэймс Хаўэлс з валійскага горада Ньюпарт сцвярджае, што ў 2013 годзе яго дзяўчына выпадкова выкінула дыск, на якім захоўвалася каля 7,5 тыс. біткойнаў. Па цяперашнім курсе гэтай крыптавалюты гэта больш за 700 млн даляраў.
Ён патрабаваў ад мясцовай рады альбо дазволіць яму правесці раскопкі, альбо выплаціць адпаведную суму ў якасці кампенсацыі. Аднак суддзя пастанавіў, што ў пазову няма рэальных юрыдычных перспектыў.
Прадстаўнікі ўладаў Ньюпарта растлумачылі, што згодна з законам выкінуты дыск усё роўна перайшоў ва ўласнасць уладальнікаў звалкі. Акрамя таго, як падкрэслілі ў мэрыі, правядзенне раскопак у смецці супярэчыць экалагічным нормам.
Хаўэлс абяцаў мясцовай радзе 10% ад сумы, атрыманай ад продажу біткойнаў у выпадку іх поспеху, але адвакаты апанентаў назвалі гэта прапанову спробай прымусіць чыноўнікаў фінансаваць раскопкі.
На звалцы, дзе знаходзіцца дыск Хаўэлса, усяго больш за 1,4 млн тон смецця. Аднак валіец сцвярджае, што здолеў адносна дакладна вызначыць месцазнаходжанне дыску: на гэтым участку знаходзіцца толькі 100 тыс. тон адкідаў.
«Гэтае рашэнне пакінула мяне ні з чым. Цяпер у мяне не засталося нічога», — заявіў Хаўэлс пасля рашэння суда. «Я стаў чарговай ахвярай «вялікай брытанскай сістэмы крывасуддзя».
«Не трэба лічыць мяне сквапным, я ж гатовы падзяліцца прыбыткамі. Але ніхто з людзей з улады, не хоча са мной нармальна размаўляць», — скардзіцца брытанец.
Ён упэўнены, што з вялікай верагоднасцю здолее аднавіць інфармацыю з дыску, хоць за гады, праведзеныя на звалцы, яго корпус напэўна іржавеў. Хаўэлс сцвярджае, што быў адным з першых энтузіястаў біткойна і ў 2009 годзе «намайніў» значную суму гэтай крыптавалюты.
Хаўэлс распавядаў журналістам, што клавіятуру ноўтбука, з дапамогай якога ён здабываў біткойны, выпадкова залілі ліманадам. Пасля гэтага ён выняў дыск, на якім захоўваліся ключы ад крыптавалюты.
Валіец таксама сцвярджаў, што на самой справе памылку зрабіла яго тагачасная дзяўчына, якая фізічна вывезла дыск на звалку. Яна, аднак, запярэчыла, што Джэймс сам папрасіў яе вывезці назапашанае смецце, што яна і зрабіла.
Хаўэлс неаднаразова прасіў гарадскую раду Ньюпарта дазволіць яму правесці раскопкі, каб знайсці няшчасны дыск, але пастаянна атрымліваў адмову.
У 2023 годзе ён вырашыў падаць у суд на гарадскую раду — гэтая спроба і скончылася для Хаўэлса канчатковай няўдачай.
Сталі вядомыя падрабязнасці пра трагедыю ў Полацкім манастыры16
Сталі вядомыя падрабязнасці пра трагедыю ў Полацкім манастыры
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары