Раман Ратушны палёг у 2022-м пад Ізюмам, а 27 лютага загінуў і Васіль Ратушны.
Ва ўкраінскага журналіста і былога аператара тэлеканала «Белсат» Тараса Ратушнага загінуў ужо другі сын.
«27.02.2025 ноччу на баявым выездзе ад прамога прылёту фпв (FPV-дрона — НН) загінуў пілот БПЛА «Птахів Мадзяра» Васіль Ратушны. Мой старэйшы сын, маё жыццё», — напісала на сваёй старонцы ў фэйсбуку маці хлопцаў Святлана Паваляева.
Малодшы сын Ратушнага і Паваляевай Раман загінуў у пачатку вайны, 9 чэрвеня 2022 года, у баі пад Ізюмам у Харкаўскай вобласці.
Тарас Ратушны ў Instagram прывёў словы сына з нядаўняй перапіскі:
«Калі я гляджу ў будучыню, то разумею: адзінае, што мяне павінна хваляваць, — шматразовае павелічэнне страт під**ам, каб хаця б на час прыпыніць баі. Усё астатняе, асабліва тое, што, наадварот, вядзе да зніжэння страт [праціўніка], проста не будзе мець сэнсу».
Васіль Ратушны нарадзіўся ў 1996 годзе, праз год — Раман. Як згадвала раней іх маці-пісьменніца, падчас Аранжавай рэвалюцыі 2004 года яна забірала сыноў, якім было 7—8 гадоў, са школы і ішла разам з імі на Майдан, які пратэставаў супраць фальсіфікацыі выбараў.
Па словах Святланы Паваляевай, увосень 2013 года ўжо Раман выцягнуў яе на другі Майдан — тады ад улады адхілілі прарасійскі рэжым Віктара Януковіча.
У 2018 годзе малодшы сын пісьменніцы ўзначаліў экалагічную ініцыятыву «Абаронім Пратасаў Яр», а ў 2019 годзе — аднайменную грамадскую арганізацыю. Актывісты здолелі адстаяць зялёную зону ў цэнтры Кіева ад забудовы.
З пачаткам поўнамаштабнай вайны Раман стаў добраахвотнікам у шэрагах Сіл абароны Украіны. Спачатку браў удзел у абароне Кіева, потым ваяваў у Харкаўскай вобласці, быў разведчыкам 93 Асобай механізаванай брыгады «Халодны Яр». Загінуў у выніку артылерыйскага абстрэлу. У гонар Рамана назвалі адну з вуліц Кіева. Пасмяротна Раман Ратушны быў узнагароджаны ордэнам «За мужнасць».
Старэйшы сын пісьменніцы Васіль Ратушны пайшоў на вайну зімою 2015 года, за два месяцы да свайго паўналецця. Святлана згадвала, што аб рашэнні свайго старэйшага сына яна даведалася ад малодшага, які выдаў сакрэт брата. У выніку яна сама сабрала яго на вайну.
Па словах пісьменніцы, у 2019 годзе, калі скончыўся кантракт, Васіль не стаў яго працягваць, а заняўся будаўніцтвам свайго дома, уласнаручна рабіў мэблю. Дом так і застаўся недабудаваны. У 2022 годзе Васіль зноў вымушаны быў ісці ваяваць. Удзельнічаў у баях на Бахмуцкім кірунку. У кастрычніку 2023 годзе ён быў узнагароджаны ганаровым знакам Галоўнакамандуючага УС Украіны «Залаты крыж».
«Я яшчэ [гэтага] не прыняла. Як ты мяне тоўк па пячонцы, калі я цябе насіла)) Мой дасканалы рыбанька. Хлопцы, твае пабрацімы, выжылі, ведай тое — усё прыляцела ў цябе», — напісала Святлана Паваляева.
Цяпер чытаюць
«У мяне толькі адна мара — вярнуць свайго Дзімку». Маці былога палітвязня Дзмітрыя Гопты расказвае пра новую бяду сына. І просіць замаўляць у яе больш тортаў, каб справіцца
Каментары