Журналісту выдання «Ранак» са Светлагорска збіраюць грошы на слыхавы апарат

Андрэй Ліпскі быў журналістам светлагорскай медыякампаніі «Ранак». На працягу 30 гадоў рэдакцыя паведамляла жыхарам горада і раёна пра навіны і падзеі. 

— Калі ў чэрвені 2023 года на мясцовым цэлюлозным камбінаце адбылася тэхнагенная аварыя, мы былі адзінымі, хто паведаміў, што аварыя не толькі забрала жыцці трох чалавек, але і мела сур’ёзныя наступствы для экалогіі Светлагорска. Лічу, што за гэта нас літаральна разграмілі за лічаныя дні. Мяне і маіх калегаў арыштавалі з надуманай прычыны. Потым быў суд, вялізныя штрафы, канфіскацыі, суткі. Сядзелі ў камеры ўчатырох, і ўсе — супрацоўнікі «Ранка». Увесь гэты час я быў у шокавым стане, — расказвае Ліпскі.

Пасля гэтага выданне закрылася, а былы журналіст у жніўні ўладкаваўся ў краму. Але сілавікі не супакоіліся.

«Думаў, што ўжо ўсё, а тут зноў — ператрус, «касманаўты» ў поўным рыштунку, арышт, штраф. Пасля зразумеў, што рыхтуюцца матэрыялы на крымінальную справу (на гэта намякнуў участковы), і адчуў проста жывёльны страх. Здавалася, не сёння-заўтра прыйдуць і скажуць: «Вы падазраваны ў здзяйсненні злачынства». Тады вырашыў тэрмінова пакінуць Беларусь», — успамінае журналіст.

Тады Ліпскага адпусцілі са штрафам, і ён у той жа вечар з’ехаў на начным цягніку. З перасадкамі дабраўся да Масквы, потым самалёт — і Арменія, далей Грузія. У Батумі журналіст пражыў амаль месяц, пакуль чакаў польскай візы. А ў верасні 2023 года паляцеў у Нямеччыну да дачкі. Там адразу папрасіў абароны, а далей закруцілася: лагеры, разгляд заяўкі.

Але ў сакавіку 2024 года ў абароне адмовілі і дэпартавалі ў Польшчу.

Журналіст запытаў абарону ў Польшчы.

«Пакуль чакаў разгляду заяўкі, падзарабляў на будоўлі і атрымліваў невялікую дапамогу ад дзяржавы. Каб аплачваць пакой, даводзілася эканоміць на самым неабходным. Цяпер я, нарэшце, атрымаў палітычны прытулак, афармляю дакументы і актыўна займаюся пошукамі працы ў Польшчы, імкнуся інтэгравацца ў грамадства. Але зусім недарэчна пачаліся праблемы са здароўем. 

У мяне вельмі пагоршыўся слых, з якім і так былі праблемы. Верагодна, сваю ролю адыгралі стрэс і знаходжанне на сутках. Плюс да ўсяго, я моцна застудзіўся ў лагеры для іншаземцаў у снежні 2023 года, таму пачаліся праблемы з барабаннай перапонкай. У Польшчы ў пачатку лютага 2025-га мне зрабілі аперацыю па аднаўленні перапонкі, але паўнавартасна чуць я ўжо не змагу».

Каб кампенсаваць зніжэнне слыху, Андрэю Ліпскаму неабходныя слыхавыя апараты. Без іх яму проста не абысціся. Да таго ж беларус уладкаваўся ў Польшчы па дамове падраду, і ў любы момант можа застацца без працы. Таму ўсё ж для падстрахоўкі (улічваючы стан здароўя) ён просіць грошай таксама на вырашэнне бытавых пытанняў на першы час.

«За 27 гадоў працы ў журналістыцы я неаднаразова бачыў прыклады ўзаемадапамогі простых людзей, сам стараўся дапамагчы тым, хто аказаўся ў бядзе. Вельмі спадзяюся на падтрымку. Дзякуй!» — гаворыць спадар Ліпскі.

Дапамагчы журналісту Андрэю Ліпскаму, які апынуўся ў складанай сітуацыі, можна тут. 

• 0
• 0
• 0
• 0
• 0
• 0
• 0
• 0